Соморсун нэһилиэгэр “Дьиэ кэргэн — олох көмүс биһигэ» диэн бастыҥ дьиэ кэргэннэри чиэстиир, Дьиэ кэргэн сылын түмүктүүр дьоро күн буолла.
Бу күн 30, 35, 40, 45, 55 сыл бииргэ олорбут нэһилиэкпит ыаллара Дьиэ кэргэн сылынан өйдөбүнньүк мэтээллэринэн наҕараадаланнылар. Ол курдук, отут сыл бииргэ олорбут Сардана Егор Борохиннар, Светлана, Валерий Еремеевтэр, 35 сыл бииргэ олорбут Мария, Михаил Трофимовтар, 40 сыл бииргэ олорбут Лариса, Семен Еремеевтэр, Марианна, Василий Ефимовтар, Тамара Ефим Каракановтар, Мария, Константин Тарабукиннар, 45 сыл бииргэ олорбут Мария, Василий Старостиннар, Мария, Федот Терентьевтар, 55 сыл бииргэ олорбут Аграфена, Николай Емельяновтар чиэстэннилэр.
Быйылгы Дьиэ кэргэн сылын «Үрүҥ көмүс дьиэ кэргэннэригэр” – 25 сыл бииргэ олорбут Марианна, Ефим Нестеревтэргэ, Чара, Роман Павловтарга билинии суруга уонна 25000 солк. суумалаах сертификаттары нэһилиэк баһылыга Алексей Кононов туттарда.
Ону тэҥэ, нэһилиэкпитигэр кыһыл көмүс сыбаайбаларын бэлиэтиир, ытык ыалларбытыгар Анна, Иннокентий Лебедевтэргэ “Кыһыл көмүс дьиэ кэргэн” билинии суруга уонна 50 000 солк. сумалаах сертификат үөрүүлээх быһыыга-майгыга туттарылынна.
Үбүлүөйдээх ыалларга Дьиэ кэргэн сылынан, нэһилиэк баһылыга олохтообут бириэмийэлэрэ, үлэ тэрилтэлэрэ сэмэй бэлэхтэрин туттардылар.
Дьоро күн саамай долгутулаах түгэнинэн 2024 сыл 8 бастыҥ дьиэ кэргэннэрин чиэстээһин, нэһилиэкпит түөлбэлэрэ туруорбут 10000 солк. суумалаах бириэмийэлэри туттарыы буолла. Ол курдук, бастыҥнар ахсааннарыгар киирдилэр:
«Эркээйилээх дьиэ кэргэн» — оҕо иитиитигэр бастыҥ үтүө үгэстэрдээх дьэ кэргэнинэн Надежда, Спиридон Охлопковтар буоллулар, бириэмийэни РСФСР үөрэҕириитин туйгуна, ветеран педагог Анастасия Федосеевна Наумова туттарда.
«Саргылаах дьиэ кэргэн» — саамай бастыҥ общественник дьиэ кэргэн — Айталина, Семен Нестеревтэр, бириэмийэни туттарда нэһилиэк баһылыгын солбуйааччыта Надежда Гаврильевна Белолюбская.
«Сайдам дьиэ кэргэн» — элбэх хаһаайыстыбалаах, бэйэтэ оҥорор дохуоттаах дьиэ кэргэн — Марина, Петр Арсентьевтар, бириэмийэни нэһилиэкпит бастыҥ бааһынай хаһаайыстыбатын салайааччыта Пелагея Харитоновна Нестерева туттарда.
«Дьулуурдаах дьиэ кэргэн» — оҕону эт-хаан өттүнэн сайыннарыыга бастыҥ көрдөрүүлээх, спорка үрдүк ситиһиилээх дьиэ кэргэн — Ольга, Александр Неустроевтар, бириэмийэни дьаһалта спорка уонна физическэй сайдыыга исписэлииһэ Михаил Николаевич Степанов туттарда.
«Талба талаан дьиэ кэргэн” — араас дьоҕурдаах, талааннах дьиэ кэргэн — Нарыйа, Афанасий Каракановтар, бириэмийэни туттарда Дархан култуура киинин салайааччыта Надежда Даниловна Игнатьева.
”Кэскиллээх ыал” — элбэх оҕолоох бастыҥ ыал Алена, Василий Ефимовтар, кинилэргэ бэйэлэрин үтүө баҕа санааларын тиэрдэн, бириэмиэйэни туттардылар Анна, Иннокентий Лебедевтэр.
“Удьуор утумнаах ыал” эһэлэрин Валерий Тараховскайы удьордаан дьоҕурдаах дьиэ кэргэн Милена, Арсений Дорофеевтар, ийэлэринээн Марианна Тараховскаялыын буоллулар, бириэмийэни туттарда Ивановтар педагогическай династия чилиэнэ, педагогическай үлэ бэтэрээнэ Мария Семеновна Смитина.
«Сайдыылаах дьиэ кэргэн”- нэһилиэк, улуус чиэһин араас таһымнаах күрэхтэргэ ситиһиилээхтик көмүскээбит дьиэ кэргэн Ариадна, Михаил Степановтар, бириэмийэни туттарда муниципальнай сулууспа туйгуна, ветерана, түөлбэ активиһа Варвара Афанасьевна Софронова.
Дьоро киэһэни эҕэрдэ нүөмэрдэринэн нэһилиэкпит талба талааннаах дьиэ кэргэннэрэ киэргэттилэр. Дьиэ кэргэн дьоһун олоҕун сырдатар, истиҥ иэйиилээх киэһэттэн дьон дуоһуйан, үөрэн-көтөн тарҕастылар.
Надежда Белолюбская.