Кыһын биир бастакы тургутуутунан аммаларга суолга массыына айана харгыстаныыта буолла. Амма – Өннүөс хайысханан мастар хаар, муус ыйааһыннарын уйбакка, саба түһэннэр суоппардарга кэккэ ыарахаттары үөскэттилэр. Ону туоратар сыалтан улуус баһылыга кыттыылаах мунньахха түөрт нэһилиэк олохтоохторо субуотунньук тэрийэргэ быһаарыныы ылбыттара. Уталыта барбакка, күүстээх эр дьон үлэҕэ тахсаннар мастары, талахтары ыраастаатылар.
Суол кытыытыгар инчэҕэй хаар баттаабыт мастарын ыраастааһыҥҥа алтынньы 17 күнүгэр күүстээх субуотунньук тэрилиннэ. Чакыр, Майскай, Болугур, Амма Наахара дьаһалталара көҕүлээннэр нэһилиэктэр тэрилтэлэрин эр дьоно бары ыһыктаах, туттар тэриллээх сарсыардаттан тахсан биир күннээх күүстээх үлэни ыыттылар. Олохтоохтор аны грейдер кэлэн суолу көннөрүн күүтэллэр.
Ирина Корякина — Олесова.