Амма Наахара нэһилиэгэр кустовой бильярд күрэҕэ буолан ааста. Күрэҕи Захар Александров баһылыктаах Амма Наахара нэһилиэгин дьаһалтата, Аҕа түмсүүтэ көҕүлээн ыыттылар.
Күрэх арыллыытын үөрүүлээх чааһыгар нэһилиэк баһылыга Захар Александров, спортивнай саала дириэктэрэ Мария Заборовская эҕэрдэ тылларын анаатылар. Хомойуох иһин, бу күрэххэ ыаллыы сытар Болугур эрэ нэһилиэгин хамаандата күрэххэ кытынна. Уопсайа 16-та спортсмен «Свободная пирамида» диэн оонньууга күөн көрүстэ. Бильярд күрэҕэ икки бөлөҕүнэн араҕыста. Бастакыта 50 сааска диэри, иккис бөлөххө 50-н үөһэ саастаахтарга ананан ыытылынна. Бөлөх ахсын аҕыстыы киһи күрэхтэстэ. Сүрүн судьуйанан Иван Пахомов үлэлээтэ.
Күрэх түмүгүнэн бастакы бөлөххө Өнньүөстэр иннилэрин биэрбэтилэр. 1-кы миэстэни Иван Пахомов, 2-с миэстэни Данил Макаров, 3-с миэстэни Павел Пахомов ылан ситиһиилиин сиэттистилэр. Онтон 50 саастарыттан үөһээ бөлөххө 1-кы миэстэни Болугуртан Владимир Саввин, 2-с миэстэ Өнньүөстэн Николай Гермогенов, 3-с миэстэ Болугуртан Савва Антипин ылан кыайыы өрөгөйүн биллилэр.
Кыайыылаахтар ортолоругар «Муҥутуур кыайыылаах» аатын сүгэр иһин тыҥааһыннаах киирсии ыытылынна. Манна кыайыылааҕынан нэһилиэкпит спортсмена, Аҕа сэбиэтин бэрэсэдээтэлэ Иван Пахомов буолла. Күрэх кыттыылаахтарыгар, көрөөччүлэргэ минньигэс астаах хаһаайка Матрёна Гермогенова ас астаан аһатта. Кыайыылаахтар харчынан наҕараадаланнылар. Бары кыттыбыт спортсменнарга, күрэх кыттыылаахтарыгар өссө төгүл эҕэрдэбитин тиэрдэбит.
Ирина Корякина — Олесова.