Болугурдааҕы «Колосок» уһуйаан уонна олохтоох бибилитиэкэтэ үгэскэ киллэрбит «Ааҕар хонуу» уус-уран хоһоон ааҕыытын күрэһин оскуола иннинээҕи саастаах оҕолорго тэрийэн ыыттылар.
Быйылгы күрэс «Эбээ, эһээ оҕотобун» диэн тиэмэнэн аҕам саастаах дьон күннэригэр уонна тапталлаах эһээлэргэ-эбээлэргэ ананна. «Ааҕар хонуу» сүрүн сыала-соруга уһуйаан иитиллээччилэригэр төрөөбүт тылга тапталы иҥэрии, тылы харыстааһын уонна Сахабыт сирин суруйааччыларын ааттарын үйэтитии буолар. Бу тэрээhиммитигэр уhуйааммыт бэтэрээн үлэhиттэрэ кэлэннэр күндү ыалдьыт буоллулар.
Күрэхпитигэр оҕолору уһуйааҥҥа өр сыл үлэлээбит, оҕо иитиитигэр-такайыытыгар элбэх сыраны-сылбаны уурбут убаастыыр бэтэрээн үлэһиттэрбит Максимова Вера Егоровна, Алексеева Елизавета Максимовна уонна иитээччи Кононова Саргылана Ивановна, ону таһынан, бибилэтиэкэр Егорова Марианна Иннокентьевна сыаналаатылар. Дьүүллүүр сүбэ кырачаан кыттааччылар хоһоону хайдах арыйан уус-ураннык ааҕалларын, сыанаҕа тутта-хапта сылдьалларын көрдө.
Күрэс түмүгүнэн, кыра бөлөххө (4-5 саастаах оҕолорго) 1 миэстэ – Давид Федотов, 2 миэстэ — Арчылаан Евсеев, 3 миэстэ — Сайнаара Березкина буолан үөрдүлэр-көттүлэр. Улахан бөлөх оҕолоругар, о.э. 5-6 саастаах оҕолорго эбээтин туһунан наһаа үчүгэйдик хоһоон этэн 1 миэстэни эрэллээхтик ылла Нарыйаана Филиппова, 2 миэстэ буолла Арсений Константинов, 3 миэстэ — Ярослав Николаев.
Кырачаан хоһоон ааҕааччылар бары Хайҕал суруктарынан уонна биһирэбил бириистэринэн наҕараадаланнылар. Оттон уһуйаан бэтэрээннэрэ туруорбут анал бириистэрин уонна “Кэскиллээх ааҕааччы” анал ааты Эрхан Платонов ылла. Кыттааччылары барыларын эҕэрдэлиибит, өссө үрдүк ситиһиилэри баҕарабыт!
Бу күн “Колосок” уһуйаан кыра бөлөҕүн оҕолоро “Эбээ, эhээ баара – дьиҥнээх дьол” диэн ааттаах хаартыска быыстапкатын, онтон улахан бөлөх оҕолоро “Эһээ, эбээ оҕотобун” диэн ааттаах уруһуй быыстапкатын көрдөрүүгэ туруордулар.
Түгэнинэн туһанан, тэрээhиммит спонсордарыгар “Уйгун” маҕаһыын салайааччытыгар урбаанньыт Федотов Андрей Егоровичка уонна Федотова Сахаяна Николаевнаҕа махталбытын тириэрдэбит.
Вера Никифорова.