Улуу нуучча омук сааһы көрсөр бырааһынньыга Масленица күннэрэ үүннүлэр. Ол сиэринэн Болугурга эмиэ билиинэ буһаран, төгүрүк күнү уруйдуур тэрээһин буолла.
Кулун тутар 15 күнүгэр сарсыардаттан кылаас оҕолоро бэйэлэрэ илиилэринэн оӊорбут Масленица куукулаларын быыстапкаҕа уурдулар. Манна араас таӊастан, соломоттон, баайыы саптан, кумааҕыттан оӊоһуллубут куукулалар кэккэлэстилэр. Сорох оҕо бэйэтэ толкуйдаан соҕотоҕун оӊорбут. Сорохтор үлэлэрэ кылааһынан диэн эбит. Быыкаайык сушканан оҕуруолаабыт диэн, араас хоруоӊканан тигэн киэргэппит диэн, кырасыабай кыргыттар сирэйдэрин ойуулаабыт диэн, араас оӊоһук манна баар эбит.
Күрэх түмүгэ: ортолорго 5 кылаас – 1 миэстэ (сал. Татьяна Алексеевна Неустроева), иккис 6 «б» (сал. Николанна Михайловна Константинова), 3-с миэстэ 7»а» (сал. Зоя Арсениевна Корнилова). улахаттарга 10 кылаас (сал. Марианна Лазаревна Седалищева) бастаата. 8-с кылаас (сал. Евгения Гаврильевна Местникова) иккистээтэ.
Начальнай кылааска 1 миэстэ – 4 кылаас (сал. Мария Николаевна Аммосова), 2-с миэстэ – 1 кылаас (Зинаида Варфоломеевна Михайлова) буоллулар. Уоннааҕы кылаастарга биирдиилээн оҕолор оӊорбуттар.
Онтон үөрэх кэннэ аны билиинэ буһарарга араас бородуукталарын туппутунан технология кабинетыгар 5, 6, 7, 8, 10 кылаас үөрэнээччилэрэ муһуннулар. Бу оҕолор кылаастан 2-лии буолан кытыннылар. Манна ас астааһын кыыс, дьахтар үлэтэ диэн арахсыы суох. Ас астааһын диэн ким баҕалаах дьарыга буолар. Үүт, сымыыт, бурдук уонна араас начыыӊка оӊорорго сөптөөх астарын аҕалбыттар. Масленица туһунан Лида Николаева кэпсээнин истэн баран, харыларын ньыппарынан, дьэ, күрэххэ түһүннүлэр. Манна билиинэ буһаран таһаарарга ыксал наадата суох. Минньигэс уонна кэрэ көстүүлээх буолуохтаах. Ону таһынан кыттааччылар хайдах буһарбыттарын бэйэлэрэ кэпсииллэр, дьүүллүүр сүбэҕэ амсаталлар. Бары көрөн олрдохпутуна билиинэлэр саһарчы буһан бардылар. Оҕолор боччумнаахтара, дьоһуннара сүрдээх. Бары кыһаллан, санааларын ууран үлэлээтилэр. Дьэ, ол кэннэ аны начыыӊканан тупсарыы, киэргэтии саҕаланна.
Билиинэ минньигэс сыта оскуолаҕа тарҕанна. Ааӊӊа баппат элбэх оҕо сирэйэ быгыаласта. Бары минньигэс билиинэ амсайыахтарын баҕараллар. Кырачаан бэһистэр улахаттары кытта тэӊӊэ бустулар-хаттылар.
Дьэ, дьүүллүүр сүбэ араас минньигэс амтаннаах, кэрэ көстүүлээх билиинэлэри тэриэлкэҕэ утахтаан, биилкэлээн аҕалан уурбуттарын амсайда. Манна баар эбит амтан арааһынайа. Сакалааттаах, бананнаах, йогуртаах, крабовай палочкалаах, оҕурсуулаах, эттээх, ириистээх билиинэ арааһа.
Улаатан эрэр оҕону бу курдук олоххо сыһыаран, астыы, оӊорон таһаарбытын кэпсии, тупсаҕай оӊорон көрдөрүү сатабылын иӊэрэр, ас астыыр идэҕэ умсугутар, астааһын кистэлэӊэр угуйар маннык тэрээһин олус наадалаах,туһалаах. Сыыйа, кэлин бу оҕолортон, баҕар, саха аһын Аан дойдуга тарҕатар, аатырдар Иннокентий Тарбаахап курдук асчыт дьон тахсыахтара турдаҕа.
Түмүк маннык буолан таҕыста. Билиинэ минньигэһин, сатаан киэргэтэн биэриини, кэпсээһини сыаналаатыбыт. Кыра кылаастарга Егоров Кеша, Филиппов Эвсан 6 «а» кылаас (салайааччы Наталья Семеновна Кузьмина) билиинэлэрэ ордук минньигэс буолан, кыайыылаах аатын ыллылар. Онтон кыра 5-стэр Петров Айтал, Кузьмин Дамир (сал. Татьяна Алексеевна Неустроева) иккис буолан үөрүү амтанын биллилэр. Уонна 7 «а» кылаас кыргыттара Чэмэлиинэ Петрова, Сайаана Саввина (сал. Зоя Арсениевна Корнилова) үһүс буолан таҕыстылар.
Улахаттарга били крабовай палочкалаах, оҕурсуулаах билиинэлээх Алиса Филиппова, Ганя Григорьев 8 кылаас (сал. Местникова Е.Г.) бастаатылар. Иккис миэстэҕэ Снежана Элягяева, Степа Пермяков 10 кылаас (сал. Марианна Лазаревна Седалищева) таҕыстылар.
Бу минньигэс тэрээһини ыыппыт, нуучча омук үгэһин биллэрбит нуучча тылын учууталлара Седалищева Марианна Лазаревнаҕа уонна Филиппова Мария Валерьевнаҕа махталбытын этэбит. Үлэҕитигэр өссө үрдүк ситиһиилэри баҕарабыт.
Дьүүллүүр сүбэ чилиэнэ Татьяна Петрова, Болугур.