Болугур оскуолатын түмэлэ бастыҥынан ааттанна

“Биир ньыгыл Арассыыйа” политическай баартыйа ыытар күрэҕэр кыттан Е.Е. Пахомов аатынан оскуола түмэлэ кыайыыны ситистэ.


Оскуола түмэлэ 2022 сыллаахха тэриллибитэ. Түмэл Болугур орто оскуолатыгар өр сыл пионер баһаатайынан үлэлээбит Людмила Евсеевна Филиппова аатын сүгэр. Түмэли саха тылын учуутала идэлээх Сахаяна Кожурова салайар. Күн бүгүн Сахаяна Юдовна кыраайы үөрэтээччилэри кытта нэһилиэк историятын түмэр кинигэни бэлэмнээн бэчээккэ ыытарга бэлэмнэнэр.

Онтон бу күннэргэ кини салайар түмэлэ “Биир ньыгыл Арассыыйа” политическай баартыйа ыытар “Историческая память” диэн уопсай үөрэх тэрилтэлэрин, ону сэргэ орто уонна үрдүк үөрэх тэрилтэлэрин түмэллэрин ортолоругар ыытар күрэҕэр “Бастыҥ оскуола түмэлэ” диэн номинацияҕа кыайыылааҕынан тахсан дипломунан наҕараадаланна уонна салгыы Бүтүн Арассыыйатааҕы күрэххэ кыттыа.

Күрэх “Солдаты Великого Отечества” диэн ааттанан ыытылынна. Өссө бу күрэххэ оскуола 6-с кылааһын үөрэнээччитэ Амелия Николаева “Юный следопыт” номинацияны ылла.

“Амма олоҕо” хаһыат

Читайте дальше