Бүгүн, Саха Өрөспүүбүлүкэтин бастакы Бэрэсидьиэнэ М.Е. Николаев төрөөбүт күнүгэр, О.П.Иванова — Сидоркевич аатынан айар сайдыы киинин Болугурдааҕы филиалын “Наследие” куруһуок иитиллээччилэрэ оскуола орто уонна улахан кылаас уолаттарыгар «Патриот диэн кимий?» диэн аһаҕас кэпсэтиилээх көрсүһүү ыыттылар.
Көрсүһүүгэ нэһилиэккэ урукку кэмҥэ баһылыгынан үлэлээбит, хас да ыҥырыыга улууска депутаттаабыт Владимир Устинович Тимофеев, нэһилиэк дьаһалтатыттан ыччат уонна спорт боппуруоһун исписэлииһэ Леонид Афанасьевич Борисов, Саха Өрөспүүбүлүкэтин уус — уран оҥоһуктарын маастара Ульяна Майродовна Михайлова- Маай кыыһа кэлэн кыттыыны ыллылар.
Куруһуок иитиллээччилэрэ М.Е.Николаев олоҕун, үлэтин — хамнаһын сырдаттылар.Ол кэннэ патриот диэн кимий диэн тема тула кэпсэтии буолла. Ыалдьыттар, оҕолор бэйэлэрин санааларын эттилэр, ырытыстылар.
Ульяна Майродовна Маай кыыһа » Күн Дьөһөгөй Тойоҥҥо сүгүрүйүү» диэн харысхал оҥоһугун дириҥ философиятын оҕолор олус сэргээтилэр.
Түмүккэ, хас биирдии кылааска харысхал хаартыската бэлэх быһыытынан туттарылынна. Патриот диэн өйдөбүл тула сэргэх кэпсэтии, интэриэһинэй көрсүһүү оҕолорго умнуллубат түгэн буолуо диэн эрэнэбит.
Сахаяна Кожурова.