Айыыһыт сыла үүммүтүнэн Таайтарыылаах Таҥха күнүгэр Болугур нэһилиэгэр оҕолорго «Өбүгэ оонньуулара» күрэх буолан ааста. Бу бэрт сэргэх тэрээһини диплом иннинээҕи практикаларыгар кэлэ сылдьар Култуура уонна Искусство коллеһын устудьуоннара Катя Осипова, София Сидорова олус интириэһинэйдик, сэргэхтик тэрийэн ыыттылар.
Күөн күрэскэ Е.Е. Пахомов аатынан орто оскуола орто сүһүөх оҕолоро кыттыыны ыллылар. Күөн күрэспит 2 түһүмэхтэн, 5 оонньууттан турар. Оҕолор үөрүүнү кытта түһүмэхтэрин ааһан, бириистээх миэстэлэргэ тигистилэр. Ол курдук, 1м. 8 кылаас оҕолоро, 2 м. 7 кылаас оҕолоро, 3 м. 7 «б» кылаас оҕолоро тиксэн эҕэрдэ суругунан, сертификаттарынан, 6 кылаастар көхтөөх кыттыыларын иһин махтал суругунан, сертификатынан наҕараадаланнылар.
Олохтоох библиотека үлэһиттэрэ оҕолорго араас остуол оонньууларын, тыксаан, мээрикээн, алаадьы, эрийии курдук оонньуулары оонньоттулар. Оҕолорбут, уолаттар сүрдээх көхтөөхтүк кыттан бэйэлэрэ да астыннылар, салгыы маннык оонньууларынан оонньотоорун диэн санааларын эттилэр.
Оонньуу бүппүтүн кэннэ алаадьы сыттаах «Эбэ кэпсээннээх түһүлгэтэ» балаҕаҥҥа мустаннар, сылаас алаадьы сии – сии «Арчылаана» эбэлэрбит дойдубут, Болугурбут сирин – уотун, өбүгэлэрбит тустарынан сэһэргээтилэр, оҕолору интириэһиргэттилэр. Оҕолор маннык тэрээһиҥҥэ сүрдээх көхтөөх буолаллар эбит, аҕыйах чаас иһигэр төлөпүөннэрин туппакка өбүгэлэрбит оонньууларын оройуттан туппуттара биһигини олус үөрдэр. Субу курдук тэрээһиннэр куруук буола турдуннар, оҕолорбутугар чэгиэн туругу, чөл олоҕу баҕарабыт.
Киэһээтин улахан дьоҥҥо ыраастаныы, арчыланыы, Тоҕус мэҥэ халлаан хамсаныытынан Алгыс ылыныы, таҥха билгэлэниитэ, Лотуо оонньуу буолла. Дьон-сэргэ боҕоруоскай отунан ыраастанан, лотуо оонньоон, сэрэбиэйдэтэн, билгэлэнэн тарҕастылар.
Евдокия Платонова.