Улуус баһылыга Степан Кузьмин уонна тыа хаһаайыстыбатын управлениетын салайааччыта Ион Кононов Болугурга тахса сылдьан отчуттары кытта көрсөн от үлэтигэр бытаарыы тахсыбытын бэлиэтээтилэр.
Болугурга икки ходуһаҕа сырыттылар. Манна отчуттар соторутааҕыта оттуу тахсыбыттар. От үүнэрин да, саппаас чаас да кэтэспиттэрин, ардахтар да мэһэйдээбитин этэллэр. Үлэ хаамыытын “Болугур” хаһаайыстыба бэрэссэдээтэлэ Михаил Ксенофонтов кэпсээтэ. Кинини кытта олохтоох дьаһалта баһылыгын солбуйааччы Раиса Софронова сырытта.
“Быйыл чахчы окко киириигэ арыый бытаардыбыт. Техникалар эргэрэн саппаас чаастарбытын булунан оҥостуу буолла. Былааммыт 2000 тонна. Күн бүгүн 250-тан тахса эрэ тоннаны оттоон олоробут. Дьиҥинэн от үүнүүтэ үчүгэй. Былааммытын ылыахпыт. Билигин окко 3 механизированнай, биир мобильнай биригээдэлээхпит. Мобильнай биригээдэбит мантан 60 км Искэхтээх диэн үрэххэ оттуу сылдьар. Кинилэр 150 тоннаны кэбиһэр былааннаахтар, былааннарын 50 бырыһыанын оҥордулар. Ый курдугунан оттоон бүтэн манна киириэхтэрэ. Оту сэргэ эбии аһылык бэлэмниэхпит. Онно зеленка оҥоруохпут. Быйыл сенажтаабаппыт буолуо. Пленка сыаната ыараан иһэр. Аны ону чыычаах, тураах алдьатан, туох да туһата суох буолар. Быйыл техникаттан саҥа охсор ротор ылбыппыт. Ол роторы күүскэ туһанар былааннаахпыт”. – диэн бэрэссэдээтэл Михаил Петрович билиһиннэрэр.
Хаһаайыстыба биир звенота Бэстээх үрэҕэ диэн. Манна Иван Дьячковскай 4 киһилээх, 3 техникалаах механизированнай звенота оттуу сылдьар. Сирин бүтэрэн атын сиргэ оттуу тахсыахтаах. Былаана 663 тонна. Күүлүпчү диэн бэрт оттоох сирдэрэ ууга сытар буолан, манна оттуу кэлбиттэр. Болугурдар биир саамай киэҥ оттуур ходуһалара Омоллоон буолар эбит. Чачхы да нэлэйэн, көнөтүнэн киһи астына көрөр. Бэрэссэдээтэл мантан 1000 рулону ыларга соруктанар. Түөрт киһилээх отчуттар биригээдэлэрин Александр Тылбыков салайан оттото сылдьар. Кинилэр былааннара 665 тонна.
“Бэйэм төрдүм Абаҕа. Манна хаһаайыстыбаҕа кэлэн звеневодтуу сылдьабын. Үс киһи оттуубут. Охсор, мунньар уонна рулоннуур тыраахтырдаахпыт. Биир повардаахпыт. Күн бүгүн 300-түү киилэлээх 200-чэкэ рулоннаахпыт. Тахсыбыппыт икки нэдиэлэ курдук буолла. Техникабыт табыллыбакка хойутаан тахсыбыппыт. Эргэ буолан манна тахсан эмиэ алдьанан бириэмэбитин сүтэрдибит. Күҥҥэ этэҥҥэ бардаҕына үчүгэй охсуу буолар. Киэһэ хараҥарыар диэри оттуубут. Бу сиргэ бүтэрэн баран салгыы барабыт, — диэн Александр Коммунарович кэпсиир.
Хаһаайыстыба отчуттарыттан айаннаан иһэн чааһынай оттуу сылдьар Михайловтарга тохтоон аастыбыт. Манна хаһаайка Александра Николаевна кыраабылынан субуутун эргитэ сылдьар. Арыый сараҕайда да, кэргэнэ кэлэн рулоннуур эбит. Кинилэр төбөлөөҕүнэн 50-ча сүөһүлээхтэр. Үүт туттарбаттар, төбөтүгэр 37 тыһыынча солкуобайы ылаллар.
“Нэһилиэккэ сири оҥорор биригээдэ баара буоллар. Бу сирбит олох дулҕа буолан бүттэ. Маны астарар киһи ходуһата кэҥиэ этэ. Бу эрдэ оннук оҥоһуллубут сир ээ”, — диэн отчут баҕа санаатын баһылыкка тириэртэ.
Дьэ ити курдук билигин сүөһүлээх дьон сайыҥҥы кураан күннэри былдьаһа сэрбэйэри эрэ барытын охсон сыл тахсар отторун булунууга үлүмнэһэн үлэлииллэр.
Ааптар: “Амма олоҕо” хаһыат