«Эппэр ийэм үүтүн кытары иӊпит эбит, быһыыта, кустук ѳӊнѳѳх, кымыс сыттаах сахам мандар саӊата» диэн тылларынан күн аайы уруокпут саҕаланар. Эмиэ бу тылларынан кынаттанан, Болугур оскуолатыгар тѳрѳѳбүт тылбыт күннэрэ буоллулар.
Олунньу ый 13 күнүгэр оскуолабытыгар киирээти кытта ситии быаӊа тиһиллибит салама кэккэтэ ыйаммыт. Ол онно оҕолор тѳрѳѳбүт тылларын күнүнэн үѳрэн-кѳтѳн туран, үтүѳ баҕа санааларын этэн туран, салама баайдылар. Оскуолабытыгар алаадьы минньигэс сыта тарҕаммыт. Сахалыы таӊастаах оҕолор, учууталлар хайдах эрэ ис-истэриттэн кѳтѳҕүллэн, сырдаан, бу күнү саҕалаатылар. Дьэ, чахчы даҕаны, саха күнэ диэх курдук күн буолбут.
Саха уус-уран тылын баайын билиигэ олимпиадаҕа оҕолор иккис сылын бэйэлэрин уус тылынан билиһиннэрэллэр. Худуоһунньук Андрей Чикачев хартыыналарын кэпсииллэр. Линейкаҕа учууталлар Кожурова Сахаяна Юдовна, Петрова Татьяна Прокопьевна быйыл улууспутугар буолар Олоӊхо ыһыаҕын туһунан кэпсээтилэр, викторина тэрийдилэр.
Онтон аны бүтүн Саха сирин үрдүнэн ыытыллар «Сахалыы дьыктаан» аахсыйаҕа кыттан, 9-11 кылаас үѳрэнээччилэрэ, учууталлар, техүлэһиттэр дьыктаан суруйдулар. Манна 2 оҕо биир да сыыһата суох суруйан, бастыӊ кѳрдѳрүүлэнэн, Кожуров Дьулус уонна Устинова Ньургуйаана «Туйгун суруксут» диэн буоллулар. Улахан дьоӊӊо Макарова Анна Петровна, Кожурова Орлеяна Михайловна «туйгуттар».
Онтон салгыы «Хааһы да саламаат» диэн ааттаах тылы билии күрэҕэр илин-кэлин түһүстүлэр. Салгыы Болугур оскуолатын мусуойугар баран, олоӊхону кѳрѳн олорон ааҕыы тэрилиннэ. Бэтэрэн учуутал Кондакова Варвара Афанасьевна, иитэр үлэни тэрийээччи Иванова Анна Васильевна, түмэл салайааччыта Кожурова Сахаяна Юдовна бэртээхэй кэпсэтиини тѳрүттээтилэр. Онно оҕолор олоӊхо туһунан, саха сиэрин туһунан истиӊник атах тэпсэн олорон кэпсэттилэр. Хоһоон айыытыгар күрэх ѳссѳ да буола турар. Уонна элбэх оҕо ыалдьыбытынан саха суруйааччыларын айымньыларынан туруоруллар инсценировка күрэҕэ кулун тутарга Театр күнүгэр кѳстѳ. Эмиэ онтон сылтаан кыра кылаас оҕолоругар «Квест-оонньуубут» кѳстѳ.
Дьэ, ити курдук биир күн соло буолбакка, оҕолор тѳрѳѳбүт тылларын туһунан бэрт сэргэх тэрээһиннэргэ кыттан, олус сѳбүлээтилэр.
Татьяна Петрова, Болугур.