Амма спортивнай олоҕор өссө биир үөрүүлээх сонун кэллэ. Болугуртан төрүттээх, Дьокуускай куорат 31 №-дээх оскуолатын үөрэнээччитэ Авелина Макарова Казахстан өрөспүүбүлүкэтин Астана куоратыгар ыытыллыбыт норуоттар икки ардыларынааҕы гимнастикаҕа күрэххэ иккис бочуоттаах миэстэни ылла.
Болугур нэһилиэгэр олорон баран, Дьокуускай куоракка киирэн олорор, үлэлиир Таисия уонна Иосиф Макаровтар кыра кыыстара Авелина Саха сирин сүүмэрдиир хамаандатыгар киирэн IX норуоттар икки ардыларынааҕы «Жулдыз cup» турнирга кыттыыны ылла. Кырачаан Авелина бу улахан күрэхтэһиигэ Сахатын сирин аатын чиэстээхтик көмүскээн иккис бириистээх миэстэни ылан үрүҥ көмүс мэтээл хаһаайката буолла. Күрэхтэһиигэ Австралияттан, Казахстантан, Кыргызтантан, Азербайджантан уонна Арассыыйаттан кыттыыны ыллылар. Авелина манна олус үчүгэйдик кыттан, көрөөччүлэргэ сөбүлэтэн, турнирга “Мисс турнира” диэн анал ааты ылла.
«Авелина гимнастиканан 3 сааһыттан дьарыктанар. Ааспыт сылтан Амма улууһун чиэһин көмүскүүр. Бу киниэхэ улахан чиэс буолар. Быйыл улуус баһылыгын өйөбүлүнэн спорт маастарыгар кандидат нуорматын толордо. Биһиги дьиэ кэргэнинэн сайын аайы Болугурга, дойдубутугар тахсан аймахтарбытыгар сынньанааччыбыт»,- диэн этэр Авелина аҕата, СӨ үтүөлээх горняга Иосиф Макаров.
Сахабыт сирин гимнасткаларын, бэйэбит биир дойдулаахпыт Авелинаны уонна кини төрөппүттэрин бу улахан кыайыынан истиҥник эҕэрдэлиибит уонна инникитин өссө үрдүк ситиһиилэри баҕарабыт.
“Амма олоҕо” хаһыат