Ааспыт күһүн Үлэ Дьоруойа П.И. Яковлев аатынан Амма Наахара орто оскуолатын боруогун биэс үөрэнээччи Тимур Макаров, Саша Александров, Максим Пахомов, Сандал Устинов, Марк Захаров билии-көрүү аартыгын эрэллээхтик арыйан үөрэнэ киирбиттэрэ, үөрэнээччи үрдүк аатын сүкпүттэрэ. Кинилэр уопуттаах учууталга, СӨ үөрэҕириитин туйгунугар Надежда Никифороваҕа үөрэнэн үөрэх сылын аҥарын атаардылар, оскуола диэн тугун биллилэр, элбэххэ үөрэннилэр.
Бүгүн кинилэр олохторугар бастакы ааҕарга, суруйарга үөрэппит кинигэлэрин, «Букубаары» кытары быраһаайдастылар. Уолаттар биэс араас көрүүлээх, барыга дьоҕурдаах, спортсмен бастыҥнара. Бэһиэбит диэн бэринэн кэбиспэккэ, бэрткэ тутуһан үөрэхтэригэр да хаалсыбаттар.
Тимур Макаров спортсмен бастыҥа, математик бэрдэ. Сандал Устинов үчүгэйдик иҥнибэккэ ааҕар, суругар үчүгэй, аны дуобатчыт. Марк Захаров уруһуйдуурун олус сөбүлүүр, билэ-көрө сатыыра үгүс. Саша Александров барытыгар дэгиттэр үчүгэй үөрэнээччи. Максим Пахомов математикаҕа ордук чорбойор. Уолаттар ааҕар буолан, бары оскуола библиотекатыгар сылдьан кинигэ уларсан ааҕан эрэллэр.Үөрүүлээх күҥҥэ төрөппүттэр оҕолоругар эҕэрдэ тылларын, баҕа санааларын эттилэр. Маҥнайгы кинигэ — букубаар уолаттарбытыгар инникитин үөрэнэр кинигэлэрин иҥнибэккэ ааҕалларыгар олук ууруо, киэҥ билии суолугар үктэнэллэригэр күүс — көмө буолуоҕа. Манна биллэн туран учууталы кытары тэҥҥэ төрөппүт үлэтэ ирдэнэр.
Ирина КОРЯКИНА-ОЛЕСОВА