Бырайыак олох суолун талыыга көмө буолуо

Идэни сөпкө талыыга Арассыыйа үрдүнэн балаҕан ыйыттан биир кэлим барыллаах «Билет в будущее» диэн ааттаах бырайыак ыытыллар буолла. Үлэ геройа П.И.Яковлев аатынан Амма Наахара орто оскуолатыгар маҥнайгы уруок 6-11 кылаас үөрэнээччилэрин хабан бэрт сэргэхтик ааста.

Эбии үөрэхтээһиҥҥэ идэни талыыга үлэлиир оскуола социальнай педагога Матрёна Романова уонна педагог-психолога Ирина Олесова үөрэнээччилэри саҥа бырайыакка киирбиттэринэн эҕэрдэлээн туран кылгас видео роликтары көрдөрдүлэр, бырайыак ис  хоһоонун билиһиннэрдилэр. Олох суолун талыыга күүс-көмө буолар бырайыак үлэтин, сыалын-соругун оҕолор ытыс таһынан, үөрэн көрүстүлэр. Учууталлар үөрэнээччилэри үс хамаандаҕа арааран «Профкоктейл» оонньууну ыыттылар. Бу Арассыыйа үрдүнэн саҥа үөрэх сылыттан үлэлиир бырайыакка хас биирдии үөрэнээччи, төрөппүт, учуутал бары кыттыыны ылыахтара. Арассыыйа бүттүүн кыттар марафонугар бырайыак кыттыылаахтара араас интириэһиргиир боппуруостарга сөптөөх эппиэттэри ылыахтара, ситим нөҥүө көрсөн олорон исписэлиистэри кытары кэпсэтиэхтэрэ, күннэтэ олоххо киирэр саҥа идэлэри билиэхтэрэ.

Оскуоланы бүтэрэр үөрэнээччи сөбүлүүр идэтин билэригэр үлэлиир бырайыак элбэх саҥаны,  сырдыгы — ырааһы эрэ аҕалыа диэн эрэнэ күүтүөҕүн. Үс социум биир санаанан үлэлээн олох суолугар чопчу идэлэрин билэр дьону үөрэтэн таһаарыаҕын, саҥаттан саҥа технологияҕа киэҥник хардыылаан киирэн иһиэҕиҥ.

Ирина Корякина-Олесова.

Читайте дальше