С.Я.Левин аатынан Бөтүҥнээҕи норуот айымньытын киинин үлэһиттэрэ саҥаттан саҥа, сонун бырайыактары суруйан өрөспүүбүлүкэ, дойду таһымнаах күөн күрэстэргэ кыттан, Граннары кыайан үлэлэригэр саҥа сүүрээни киллэрэллэр. Оннук биир «Ай-Тик» диэн социальнай бырайыагы Марианна Кырбасова толкуйунан Айталина Ивановалыын бырайыагын суруйан «Росмолодежь. Гранты» федеральнай таһымнаах күөн күрэскэ кыттан, кыайыылааҕынан тахсыбыттара.
Бырайыак олоххо киирэригэр иистэнэр массыыналары, остуоллары, өтүүктэри о.д.а. тэриллэри атыылаһан иис мастарыскыайын үөрүүлээх быһыыга аспыттара. Онно 10 эдэр ийэни 2 ый устата нэһилиэкпит уопуттаах бастыҥ иистэнньэҥнэрэ Марианна Борисова, Марианна Неверова, Саргылана Чабыкина, Туяра Давыдова иис кистэлэҥнэригэр үөрэттилэр.
Ол курдук, эдэр ийэлэр Анжелика Никитина, Сахаяна Гурьева, Айыына Иванова, Алена Андреева, Надежда Гурьева, Тапталаана Неустроева, Айна Алексеева, Кюнняй Нестерева, Мария Жиркова, Снежана Егорова таҥаһы быһарга, мээрэй ыларга, массыынанан сахалыы оһуору тигэргэ үөрэннилэр, дьиэҕэ кэтэр таҥаһы, оҕо таҥаһын, сахалыы оһуор быысабайдаах үтүлүгү, сахалыы халадаай ырбаахыны тиктилэр. Икки ыйдаах үлэлэрин түмүгүн олоохтоохторго отчуот быһыытынан көрдөрдүлэр. Тэрээһини Дмитрий Саввинов иилээн-саҕалаан ыытта. Амматтан кэлбит ыалдьыттарбыт Николай Пухов, Василий Кочаткин, Николай Нестерев, Дмитрий Саввинов ырыанан киэргэттилэр. Амма улууһун баһылыгын социальнай эйгэҕэ солбуйааччыта Ньургуйаана Илларионова бырайыак кыттыылаахтарын эҕэрдэлээтэ, тэрийээччилэргэ Бочуоттаах Грамоталары туттарда. Ол курдук Айталина Иванова “СӨ Ыччат политикатын туйгуна” бэлиэнэн, Марианна Борисова СӨ ыччат министиэристибэтин Махтал суругунан наҕараадаланнылар. Олохтоох дьаһалта баһылыга Алексей Никитин эмиэ эҕэрдэлээн туран, маастар-кылааһы ыыппыт бастыҥ иистэнньэҥнэргэ Махтал суруктары туттарда. Түмүгэр «Көрөөччү биһирэбилин» Мария Жиркова, 3-с миэстэни Надежда Гурьева, 2-с миэстэни Тапталаана Неустроева ыллылар. Муҥутуур кыайыылааҕынан Айыына Иванова ааттанна уонна дипломунан, харчынан бириэмийэнэн бэлиэтэннэ. Кыттыбыт ийэлэргэ барыларыгар туоһу суругу, сэмэй бэлэхтэри туттардылар. Онон «Иннэлээх сап абылаҥа» диэн «Ай-Тик» биир улахан бырайыак үлэтин түмүктээн дьон-сэргэ биһирэбилин ылла. Салгыы иистэнэр мастарыскыайга нэһилиэк далбардара, түмсүүлэр, уран тарбахтаахтар иис үлэтигэр кыттар кыахтаныахтара.
«Бу бырайыагы киллэриэхпин баҕарбытым ыраатта. Кулууппут иһинэн уран оҥоһуктар уонна иис-уус бөлөхтөрүн салайааччыта буолан баран тарбахтарыгар талааннаах дьону түмэр хос баар буолуон баҕарбытым. Иистэнэр массыыналардаах мастарыскыай баара буоллар дии санаабытым. 2023 сыллаахха Айталина Ивановалыын 2 бырайыагы суруйбуппут. «Тайна чайки» бырайыагы кытта мастарыскыайбыт бырайыагын эмиэ суруйбуппут. Онно мастарыскыайбыт бырайыага ааспатаҕа. Ол иһин семинардарга сылдьан үөрэнэн, билэн-көрөн, туһааннаах дьонтон сүбэлэтэн баран, саҥаттан суруйбуппут. Онтубут 2024 с. бэс ыйын бүтүүтэ биллэн кыайыылаах буолан үөрүүбүт улахан этэ. Бырайыак Снежана Егорова аатынан барбыта. Онон бу бырайыакпыт үлэтэ ситиһиилээхтик түмүктэннэ», — диэн бырайыак хайдах саҕаламмытын Марианна Кырбасова сырдатта.
» Бырайыакпытын олоххо киллэриигэ олохтоох Степан Яковлевич Левин аатынан норуот айымньытын киинин үлэһиттэрэ, олохтоох дьаһалта, түмсүүлэр бары күүс-көмө буоллулар. Киин дириэктэрэ Анна Федоровна Яковлева өйөөн хос биэрбитэ уонна кини сүбэтинэн-аматынан, докумуон оҥоһуутугар, өрөмүөнүгэр эмиэ көмөлөспүтэ. «Тайна чайки» бырайыакпыт Граҥҥа кыайан былырыын үҥкүүнэн испэктээк туруорбуппут. Быйылгы бырайыакпытыгар кыттыбыт иистэнньэҥнэрбитигэр, эдэр ийэлэргэ көхтөөхтүк кыттыбыттарыгар истиҥник махтанабыт. Маннык күөн күрэстэр ыра санаабытын олоххо киллэрэргэ улахан кыаҕы биэрэллэр. Онон өссө да үлэлэһиэхпит дии саныыбын», — диэн бырайыак биир ааптара Айталина Иванова санаатын үллэһиннэ.
Светлана НЕУСТРОЕВА