Чакыр орто оскуолатын үөрэнээччилэрэ билиҥҥи кэмҥэ тыа сиригэр сыһыаннаах идэлэр тустарынан билистилэр. Оскуола оҕолоро кылгас кэм иһигэр анал куурустарга үөрэниэххэ, идэлэри баһылыахха сөбүн олус сэргээтилэр, үөрэнэргэ баҕа санааларын биллэрдилэр. Ыҥырыылаах ыалдьыт, Дьокуускайдааҕы тыа хаһаайыстыбатын техникумун элбэх хайысхалаах прикладной квалификациятын киинин исписэлииһэ Марфа Дмитриева оскуола үлэтин-хамнаһын билистэ, оҕолору кытта кэскиллээҕи кэпсэттэ, нэһилиэк музейыгар сырытта.
«Чакыр орто оскуолатын 10 -с кылааһын салайааччыта Мария Александровна Кириллина уонна оскуола бибилэтиэкэрэ Светлана Николаевна Новикова ыҥырыыларынан 6-11 кылаас оҕолоругар тыа хаһаайыстыбатын идэлэрин билиһиннэрдим. Оҕолор ордук бэтэринээргэ, сылгыһыкка, мүөттээх ыҥырыаны иитээччигэ, эт астан полуфабрикаттары бэлэмнээччигэ сыһыаннаах идэлэри интэриэһиргээтилэр уонна үөрэнэр баҕалаахтарын биллэрэн суруйтардылар. Мин сүрүн сыалбым-сорукпун тыа сиригэр үүнэр ыччат оробуочай идэлэри билэн, баһылаан инники олоҕор туһаннын, атын да идэлээх буоллаҕына биһиги көмөбүтүнэн дьарыктаах, сир хаһаайына буоллун, ийэ-аҕа аатын ыллаҕына дьиэ кэргэн бэйэ бородууксуйатын оҥорон таһааран сибиэһэй астаах-үөлээх буоларыгар туһаайабын. Аныгы киһи төһөнөн элбэх идэни баһылыыр да оччонон билиитэ-көрүүтэ кэҥиир, кыаҕа улаатар. Иккиһинэн, оҕолор тыа хаһаайыстыбатын идэтин баһылааннар олохторун тухары хамнастаах үлэһит буолуохтарын сөп. Билиҥҥи кэмҥэ нэһилиэнньэ ынах сүөһүнү, сылгыны иитиини таһынан түргэнник ситэр салааны улаханнык сэҥээрэр буолла. Маныаха оскуола оҕолоруттан, учууталлартан, төрөппүттэртэн саҕалаан ким баҕарар бу идэлэргэ кылгас кэм иһигэр үөрэниэхтэрин сөп. Ол курдук бу куурустарга 1-3 ый устата миэстэтигэр эбэтэр тэйиччиттэн олорон теорияны, оттон практика чаастарын тыа хаһаайыстыбатын техникумун лабораториятыгар киирэн эбэтэр улууспут хаһаайыстыбаларыгар, тэрилтэлэригэр сылдьан илэ көрөн, тутан-хабан, толорон үөрэниэххэ сөп. Куурус төлөбүрэ ханнык идэтиттэн уонна төһө өр буоларыттан тутулуктаах, 5 тыһыынчаттан саҕаланар. Оҕолор уонна улахан дьон мүөттээх ыҥырыаны иитээччи, көтөрү иитээччи, оҕуруотчут, сибэккини үүннэрээччи, сылгыһыт, асчыт, атыылааччы, эт аһылык полуфабрикаттарын бэлэмнээччи, массыынанан ыаһын оператора, бэтэринээр идэтигэр дьиэ кыылларын обработкалааһын оператора о.д.а идэлэргэ кылгас куурустарга миэхэ суруйтарыахтарын сөп. Улууспут атын оскуолалара чакырдар курдук оҕолоргут тыа хаһаайыстыбатын идэлэрин оскуола паартатыгар олорон ылалларын, баһылыылларын курдук үлэни эмиэ ыыталларыгар баҕарабын. Миигин кытта билсэр төлөпүөнүм нүөмэрэ – 89142924594. Тыа сирэ инникилээх, сайдыылаах, дьиэ кэргэн тирэхтээх, тиэргэн хаһаайыттара бэлэмнээх, доруобай астаах-үөллээх, оҕолорбут идэлээх, үлэлээх-хамнастаах буолалларыгар билиҥҥэттэн кыһаллыаҕыҥ», — диэн Марфа Егоровна санаатын тириэрдэр.
Алтана АРТЕМЬЕВА, үөрэх салалтатын иитэр үлэҕэ уонна эбии үөрэхтээһиҥҥэ салаатын сүрүннүүр исписэлииһэ