2-Чакыр нэһилиэгэр «Сомоҕолоһуу» диэн девизтээх тэрилтэлэр икки ардыларыгар «Муус-шоу» күрэх өрө көтөҕүллүүлээхтик буолан ааста. Ол түмүгэр нэһилиэкпит аҕам саастаах дьонугар, байыаннай дьайыы кыттыылаахтарын дьиэ кэргэттэригэр, уопсайа 32 ыалга кыстыыр муустара ылылынна.
Күрэххэ «Чакыр нэһилиэгэ» МТ дьаһалтата (сал. Григорьев Семен Николаевич), ОДьКХ хамаандата (сал. Алексеев Николай Иннокентьевич), баһаарынай чаас хамаандата сал. Григорьев Николай Васильевич) уонна оскуола хамаандата (сал. Свинобоев Иннокентий Саввич) кыттыыны ыллылар.
Күрэх быраабылатын «Эркин» аҕа түмсүү салайааччыта Тихон Михайлович Матвеев быһааран биэрбитин кэннэ, күрэҕи сүрүннээччи — баһылык Семен Николаевич Григорьев эрдэттэн бэлиэтэммит сирдэри ыйан күрэҕи үөрүүлээхтик аста.
Күрэх түмүгүнэн кыайыылаахтар билиннилэр, ол курдук кыайыылааҕынан Свинобоев Иннокентий Саввич, Матвеев Тихон Михайлович, Александров Эрчимэн Васильевич, Карманов Андрей Иванович, Филиппов Павел Филиппович састааптаах оскуола хамаандата таҕыста. Иккис баһаарынай чаас хамаандата — Григорьев Николай Васильевич, Бессонов Владимир Васильевич, Осипов Петр Петрович, Корнилов Дьулустан Владимирович, Лобанов Василий Юрьевич буолла. Үһүс бириистээх миэстэҕэ ОДьКХ хамаандата таҕыста — Алексеев Николай Иннокентьевич, Нерлов Егор Дмитриевич, Нерлов Гаврил Гаврильевич, Неустроев Артур Афанасьевич, Николаев Валерий Петрович. Уонна дьаһалта хамаандата — Григорьев Семен Николаевич, Христофоров Гаврил Алексеевич, Тарасов Иннокентий Николаевич, Матвеев Семен Серафимович, Антипин Гаврил Николаевич төрдүс миэстэ буолла.
Кыайыылаахтар мэтээллэринэн, грамотанан, бириистэринэн наҕараадаланнылар.
Күрэх кэннэ кыттааччылар кулууп, социальнай тэрилтэ үлэһиттэрэ тэрийбит итии чэйдээх, сибиэһэй идэһэ эттээх мииннээх остуолугар итии киллэринэн күүс, сэниэ эбиннилэр.
Ити курдук, уопсайа 32 ыалга муус ылылынна. Чакырдар, өссө да бу курдук сомоҕолоһон, үлэни өрө тутан түмсүүлээхпитин көрдөрүөххэйиҥ, өрүү бииргэ буолуоххайыҥ.
Дария Лукина.