Чакыр нэһилиэгэр алтынньыга уон күн устата Аҕам саастаахтарга аналлаах декада араас хабааннаах тэрээһиннэрдээх, сэргэх күрэхтэрдээх олус көхтөөхтүк барда. Бииртэн биир интэриэһинэй көрсүһүүлэргэ сылдьан биир дойдулаахтарбыт сэргэхсийдилэр, саастыылаахтарын кытта ирэ-хоро кэпсэттилэр.
Бастатан туран, дартс, уксаан, лото, баарыс, мас оонньуу курдук остуол оонньууларын көрүҥнэригэр сүрдээх тыҥааһыннаах күрэхтэр ыытылыннылар.
Чакыр аҕам саастаахтарыгар биир умнуллубат түгэнинэн Аммаҕа «Туймаада» ансаамбыл театрализованнай кэнсиэригэр киллэрэн, сэргэхсийэн тахсыбыттара буолар. Кырдьаҕастарбыт 14 буолан элбэхтэ барбат-кэлбэт дьон буолан олус астынан, үөрэн-көтөн кэллилэр. Маныаха биһигини өйөөн транспорынан хааччыйбыт Амматааҕы социальнай көмүскэл киинин салайааччытыгар Любовь Дорофееваҕа, нэһилиэкпит баһылыгар Семен Григорьевка улахан махталбытын биллэрэбит диэн саастаах дьоммут социальнай ситим нөҥүө тириэрдэллэр.
Маны таһынан Чакыр орто оскуолатын коллектива, үөрэнээччилэрэ декадаттан туора турбакка сылын ахсын Аҕам саастаах дьоммутугар мас хайытан, дьаарыстаан, оҕуруот, дьиэ тас үлэтигэр куруук күүс – көмө өйөбүл буоланнар улаханнык абырыыллар. Өссө күһүҥҥү оҕуруот аһыттан бэрсэн эбэлэрбитин, эһэлэрбитин күндүлүүллэр.
Оттон Р.В. Илларионова аатынан Чакырдааҕы олохтоох библиотека «Мин дойдум- Саха сирэ» диэн олус интэриэһинэй, сэргэх күрэҕи ыытта. Манна Анна Васильева күрэх муҥутуур кыайыылааҕынан буолла, кыттыбыт дьоммутугар барыларыгар өйдөбүнньүк бэлэхтэр туттарылыннылар. Библиотека бастыҥ ааҕааччыларыгар Гаврильева Евдокия Иннокентьевнаҕа, Крылова Марина Софроновнаҕа, Григорьев Николай Николаевичка, Игнатьева Светлана Николаевнаҕа, Варламова Светлана Ивановнаҕа Махтал суругу кытта сэмэй бэлэхтэр библиотека аатыттан туттарылыннылар.
«Күбэйэ» үҥкүү бөлөҕө Чапчылҕан бөһүөлэгэр баран ыалдьыттаан, олус сэргэх тэрээһиҥҥэ кыттан, кыайыы көтөллөөх үөрэн – көтөн, кэрэ кэпсээн кэһиллээх кэллилэр.
Чакыр кэрэ куолара – дьахталлар түмсүүлэрэ, „Россия ийэлэрэ“ общественнай түмсүү кыттыылаахтара үгэскэ кубулуйбут «Илии сылааһа» акцияны быйыл эмиэ тэрийэннэр соҕотох олорор Аҕам саастаах дьоммутугар болҕомто ууран үөртүлэр. Маны таһынан Алексеева Матрена Иннокентьевна бэйэтин көҕүлээһининэн Аҕам саастаах соҕотох олорор эр дьоҥҥо кыһыҥҥы үтүлүк тигэн бэлэхтээтэ.
Быйылгы Декадабыт сабыллыытын ырыа аргыстаах, хаартыска күрэхтээх, оонньуулаах, үбүлүөйдээх дьоммутун бэлиэтээн биир атын тыыннаах тэрээһин гына ыыттыбыт.
Биир сонун тэрээһин – коллекционердар быыстапкалара Түмэлгэ дьон- сэргэ көрүүтүгэр туран улахан сэргэхсийиини таһаарда. Манна араас элбэх оҕуруонан тиһиллибит оҥоһуктар, өрүспүт тааһыгар уруһуйдар, үүттээх, араас быһыылаах таастар, 2006-2024 сыл устата мунньуллубут «Саха ыалын халандаара», чуорааннар, кэмпиэт суулара уо.д.а. көрүөххэ сөп.
Итиэннэ нэһилиэк тэрилтэлэрэ ытык кырдьаҕастарбытыгар „Амма олоҕо“ хаһыакка 6 ыйга сурутууну бэлэх уунаннар саха тыллаах хаһыат үйэтийэригэр дьоһун хардыыны оҥордулар.
Бу курдук Аҕам саастаах дьоммут декадаларыгар туора турбакка , болҕомто ууран араас хабааннаах тэрээһиннэргэ кыттан, күүс- көмө, өйөбүл буоларгытыгар бар дьоммутугар нэһилиэк дьаһалтатын аатыттан ис сүрэхпититтэн истиҥник махтанабыт. Бу курдук бииргэ үлэбитин ыытарбыт үтүө түмүктээх буолара саарбаҕа суох.
Мария Шепелева, Чакыр.