СӨ Бырабыыталыстыбатын бэрэссэдээтэлин солбуйааччы Сергей Местников суһал мунньахха кыттар буолан, Чакыр нэһилиэгэр отчуоту СӨ ветеринариятын Департаменын салайааччытын э.т. Петр Петров туруорда. Олохтоохтор ордук тоокколоһон уматык сыанатыгар, киин ититэр ситиминэн туһаныы, чуолаан гараж иһин төлөөһүн туһунан ыйыталастылар, аппаларын, өрүһү туорааһын туһунан чопчулаатылар.
Улуус баһылыга Степан Кузьмин чакырдар аппа, өрүһү туорааһын туһунан кыһалҕаларын билэрин, чугастык ылынарынан, саас, күһүн туоруурга хайдах эрэ гынан дьоҕус сыаналаах “Хивус” оҥочо булан биэрэргэ бэлэмин эппитин олохтоохтор олох үөрэ ылыннылар. Аппа да боппуруоһугар СӨ айылҕа министиэристибэтин кытта ыкса үлэ бара турарын иһитиннэрдэ. Отчуоттарга куруутун нэһилиэктэрин туһугар санааларын тириэрдэр Валентина Нерлова, Юрий Прокопьев тирээн турар кыһалҕаларга тохтоон, боппуруостаһан хааллылар.
Юрий Прокопьевич бэтэринээрнэй өҥө сыллата ыарыы турарын, олохтоох бэтэринээрдэргэ эмтэрэ суох буоларын, сууллан сытар маһы ылыы уустугун, сирдэрэ кыараҕаһа сүөһү ииттэргэ уустуктары үөскэтэрин, кэнники кэмҥэ дьону аралдьытар тэрээһиннэр наһаа элбээбиттэрин, үлэ дьоно умнууга хааларын, нэһилиэк аннынан 200 миэтэрэ курдук уһуҥҥа биэрэги бөҕөргөтүү үлэтэ барара уолдьаспытын, ититэр ситимтэн сылытынар дьоҥҥо субсидия көрүллэрин курдук, оһох оттон олорор ыалга эмиэ субсидия көрүллэрэ хайаатар да наадатын туруоруста.
Боппуруостарга СӨ сыана бэлиитикэтигэр судаарыстыбаннай кэмитиэтин бэрэссэдээтэлин бастакы солбуйааччы Марина Лыкова, “Сахаагроплем” ГБУ салайааччыта Алексей Жирков бэрт сиһилии чуолкайдык эппиэттээтилэр. Уопсайынан да дьон отчуокка кэлэн бэйэлэрин “ыалдьар” боппуруостарын туруоран, онно туһааннаах салайааччылары кытта сирэй сирэйгэ көрсө олорон эппиэттэри тута ылаллара астыгын олохтоохтор этэллэр.
“Маннык отчуоттар буолаллара үчүгэй бөҕө буоллаҕа. Этиилэрбитин да этэн, санаабытын да тириэрдэн, кыһалҕалаах боппуруостарбытын туруорсабыт. Ыытыллыбыт үлэ туһунан сиһилии дакылааты иһиттибит уонна үлэ ыытылларын бэлиэтээн туран биһириирбитин биллэрдибит”, — диэн орто оскуола учуутала Тихон Матвеев санаатын үллэһиннэ.
“Амма олоҕо” хаһыат