Амматааҕы Н.С. Захаров — Сахаачча аатынан оҕо спортивнай оскуолатын дириэктэрэ Дмитрий Неустроев кыра сааһыттан олоҕун успуорду кытта холбообута. Кини аҕата Петр Неустроев ССРС спордун маастара, көҥүл тустууга өрөспүүбүлүкэ хас да төгүллээх чөмпүйүөнэ, призера. Дуобатынан эмиэ утумнаахтык дьарыктаммыта. Ол да иһин буолуо, Дмитрий олоҕун суолун эмиэ спорду кытта ситимниир. Билигин кини оҕолору успуорт эйгэтигэр уһуйар оскуоланы салайар.
«Биһиги успуорт оскуолабыт 1066 иитиллээччилээх. Үс улахан эбийиэктээхпит. Улуус үрдүнэн 12 филиаллаахпыт. Кэлэктииппит 90-ча киһи. Мантан 40-тан тахса тренер, 30-ча техперсонал, ону сэргэ административнай үлэһит, түөрт дириэктэри солбуйааччы. Иитиллээччилэри успуорт тоҕус көрүҥэр уһуйабыт. Ол курдук көҥүл тустуу, чэпчэки атлетика, волейбол, хайыһар, мас рестлинг, дуобат, остуол тенниһэ, буулдьанан ытыы, ох саанан ытыы киирэллэр. 2018 сыллаахха элбэх функциялаах саалабыт аһыллыбыта. Ону кытта 3000 олорор миэстэлээх стадион, ичигэс манежтаах. Онон нэһилиэнньэ маассабай успуордунан дьарыктаныыта улааппыта. Күн бүгүн оҕо-аймах, олохтоохтор да саалабытыгар, манежка да кэлэн күннэтэ дьарыктаналлар, эттэрин-хааннарын эрчийэллэр. Бу күннэргэ Дойдубут Бэрэсидьиэнэ Владимир Путин Федеральнай Мунньахха оҥорбут Туһаайыытыгар успуордунан дьарыктаныыга улахан болҕомтотун уурда. Кини бэйэтэ эмиэ спортсмен. Онон бу эйгэ эмиэ сайдарыгар, нэһилиэнньэ бэйэтин доруобуйатын тупсарынарыгар элбэх быһаарыылары ылар. Бу Туһаайыыга холобура, ГТО нуорматын туттарыыга кэккэ этиилэр киирдилэр. Уопсайынан ГТО урукку кэмтэн сөргүтүллэн күүскэ киирбитэ биһигини, успуорка үлэлээччилэри олус үөрдэр»-, диэн Дмитрий Петрович санаатын үллэһиннэ.
«Амма олоҕо» хаһыат