“Доҕордоһуу кубога” отутус төгүлүн ыытылынна

Муус устар 13-14 күннэригэр  Сулҕаччы нэһилиэгэр үгэс буолбут “Доҕордоһуу кубога” аһаҕас волейбол турнира буолан ааста. Бу күрэх 1988 сыллаахха  оччотооҕу ыччаттарынан уонна кинилэр баҕа санааларын олоххо киллэрэргэ көмөлөспүт, өйөөбүт спорт энтузиастарынынан тэриллибитэ, олор истэригэр ааттыаҕы баҕарыллар ол кэмнээҕи нэһилиэк  бастакы  сүүмэрдэммит хамаандатыгар оонньообут эдэр ыччаттары :  Михаил Неустроев-Баһыллар, Федот Капитонов, Анатолий Константинов, Андрей Неустроев, Петр Ефремов, Иннокентий Никифоров уо.д.а.

Сылын аайы ыытыллан, дьиҥнээх спорт түһүлгэтэ буолбута эрээри, ковид кэмигэр тохтуур турукка киирбитэ. Ону быйыл Сулҕаччы нэһилиэгин дьаһалтата, тэрилтэ салайааччылара, волейбол ветераннара, спорт энтузиастара сүбэлэһэн сөргүттүлэр. Уонна үбүлүөйдээх 30-с төгүлүн бэлиэтээн бу улахан турниры ыыттылар.

Икки күннээх турнирга уолаттарга 8, кыргыттарга 8, барыта 16 хаимаанда оонньоото: уолаттарга Сулҕаччы 1 (ыччаттар), Сулҕаччы 2 (оскуола үөрэнээччилэрэ), Сулҕаччы 3 (ветераннар),  Абаҕа, Соморсун, Алтан, Болтоҥо (Чурапчы улууһа), Түүлээх (Уус-Алдан улууһа), кыргыттарга Абаҕа 1 (улахан дьон), Абаҕа 2 (оскуола үөрэнээччилэрэ), Сулҕаччы 1 (улахан дьон),  Сулҕаччы 2 (оскуола үөрэнээччилэрэ), Бөтүҥ, Алтан, Соморсун, Нөмүгү (Хаҥалас улууһа). Күрэхтэһии кэмигэр Х.Максимов аатынан культура киинин үлэһиттэрэ кыттааччылары, көрөөччүлэри сөбүгэр сыанаҕа сылаас аһынан аһаттылар. Түмүк маннык буолла:

Кыргыттарга : I миэстэ Абаҕа 1 (улахан дьон),  II миэстэ Нөмүгү (Хаҥалас улууһа),  III миэстэ Алтан хамаандалара.

Уолаттарга: I миэстэ Абаҕа, II миэстэ Сулҕаччы 2 (оскуола үөрэнээччилэрэ), III миэстэ  Сулҕаччы 1 (ыччаттар) хамаандалара.  Онон Абаҕалар кыргыттарга да, уолаттарга да “Доҕордоһуу кубогын” хаһаайыннарынан буоллулар.

 

Маны сэргэ  үгэс быһыытынан бастыҥ оонньооччуларга нэһилиэк тэрилтэлэрэ, бастакы волейболистар дьиэ кэргэттэрэ, ыччаттара, урбаанньыттар, анал байыаннай дьайыыга Ийэ дойдуларын көмүскүү сылдьар буойуннар анал бириистэрэ туттарылынна.

Ол курдук кыргыттарга :

“Бастыҥ быһааччы” – Иванна Иванова (Абаҕа 1), бирииһи туруорда Сулҕаччы нэһилиэгин дьаһалтата.

“Бастыҥ көмүскээччи” – Караканова Нарыйа (Соморсун), бирииһи туруорда  “Гермес” маҕаһыын, урбаанньыт Дыдаев Н.Г.

“Бастыҥ оонньотооччу” —  Смитина Марианна (Абаҕа 1), бирииһи туруорда Сулҕаччы нэһилиэгин библиотекара Попова Е.В.

“Кэскиллээх оонньооччу” – Никитина Олеся (Абаҕа 1), бирииһи туруорда урбаанньыт Терентьев С.С.

“Ветеран оонньооччу ” – Степанова Мария (Соморсун), бирииһи туруорда волейбол ветеран оонньооччута  Феофанова Т.Н.

“Туһалаах оонньооччу” – Баишева Деянира (Нөмүгү, Хаҥалас улууһа), бирииһи туруорда Сулҕаччы нэһилиэгин дьаһалтата.

“Көрөөччү биһирэбилэ” – Максимова Мария (Сулҕаччы 1), бирииһи туруорда Сулҕаччы нэһилиэгин дьаһалтата.

“Бастыҥ оонньооччу” – Фоменко Лена (Нөмүгү, Хаҥалас улууһа), бирииһи туруорда Фомин А.К.

“Бастыҥ спортивнай дьиэ кэргэн” —  Алтан сүүмэрдэммит хамаандатын чилиэннэрэ Дайаана, Ньургуйаана уонна Туяра Ноговицыналар, бирииһи туруорда Сулҕаччы нэһилиэгин дьаһалтата.

Уолаттарга :

“Бастыҥ быһааччы” —  Стручков Радислав (Сулҕаччы 1), А.Ю. Христофоров аатынан бирииһи туруорда ийэтэ Крюкова С.А.

“Бастыҥ көмүскээччи” – Кононов Николай (Соморсун), бирииһи туруордулар ветеран волейболистар.

“Бастыҥ оонньотооччу” – Колосов Владимир (Сулҕаччы 2), волейбол турнирын бастакы бииргэ төрөөбүттэрэ уонна тэрийээччилэриттэн биирдэстэрэ  М.М. Неустроев аатынан бирииһи туруордулар бииргэ төрөөбүттэрэ уонна кэргэнэ А.Г. Неустроева.

“Кэскиллээх оонньооччу” – Варламов Кеша (Сулҕаччы 2), бирииһи туруорда Сулҕаччы нэһилиэгин дьаһалтата.

“Ветеран оонньооччу ” – Окороков Иван (Сулҕаччы 3), бирииһи туруорда  Сулҕаччы нэһилиэгин дьаһалтата.

“Туһалаах оонньооччу” – Третьяков Семен (Болтоҥо, Чурапчы), бирииһи туруорда  Сулҕаччы нэһилиэгин дьаһалтата.

“Көрөөччү биһирэбилэ” – Красин Юрий (Абаҕа), бирииһи туруорда Сулҕаччы нэһилиэгин дьаһалтата.

“Бастыҥ оонньооччу” – Сивцев Сергей (Абаҕа), Ф.С. Капитонов аатынан бирииһи туруордулар кэргэнэ, оҕолоро, аймахтара.

“Волейболга бэриниилээх оонньооччу”  – Христофоров Айсен (Сулҕаччы 1), бирииһи туруордулар М.М. Неустроев бииргэ үөрэммит оҕолоро.

“Үчүгэй оонньуутун иһин” – Михайлов Геннадий (Сулҕаччы 1), бирииһи туруорда Сулҕаччы нэһилиэгин дьаһалтата.

“Бастыҥ ветеран оонньооччу” —  Варламов Андрей (Сулҕаччы), бирииһи туруордулар СВО-ҕа сылдьар буойуннар.

 

Күрэх бастакы күнүн киэһэтигэр спорт ветеран, энтузиаст, тэрийээччи, “Доҕордоһуу кубога”  күрэх бастакы тэрийээччилэриттэн биирдэстэрэ Михаил Михайлович Неустроевка аналлаах күрэх ыытылынна. Сулҕаччы нэһилиэгин дьаһалтата (баһылык Артем Степанов) бары спонсордарга уонна турниры ыытарга көмөлөспүт дьоҥҥо “”Махтал сурук” уонна өйдөбүнньүк значок туттарда.

Ити курдук икки күн устата Сулҕаччы нэһилиэгэ волейброл туонатынан буолан бары да сэргэхсийэн ыллыбыт.

 

Елена Попова.

Читайте дальше