Үлэ Дьоруойа П.И.Яковлев аатынан Амма Наахара орто оскуолатыгар сыллата ыытыллар кустовой «Дьоҕур» күрэҕэ быйылгы сылга Чакыр, Болугур, Амма Наахара үөрэнээччилэрин түмтэ. «Дьоҕурга» 6-7-с кылаастартан 15, онтон 8-с кылаастартан 9 оҕо күрэхтэстэ. Эдэр математиктары, физиктары түмэр аһаҕас хамаанданан күрэххэ үөрэнээччилэр олус көхтөөхтүк кытыннылар. Күрэх сыалынан математика, физика уруоктарыгар оҕо интэриэһин көтөҕүү, үөрэнээччилэргэ бэйэ-бэйэлэригэр эйэлээх сыһыаны олохтооһун, учууталларга үлэ уопутун хардарыта атастаһыы, бу билим хайысхатыгар дьоҕурдаах үөрэнээччилэри улууска ыытыллар күрэххэ талыы буолла.
Чакыр оскуолатыттан сэттэ үөрэнээччини математика учуутала Юлия Алексеева, Болугур оскуолатыттан эмиэ сэттэ үөрэнээччини математика учуутала Антонина Филиппова уонна Амма Наахараттан уон үөрэнээччини математика учууталлара Валентина Ефремова, Людмила Александрова, физика уонна информатика учуутала Лия Устинова салайан кытыннардылар. Сарсыарда өттүгэр 6-7-с кылаастарга математика, 8-с кылаастарга математика уонна физика олимпиадалара үрдүк таһымҥа ыытылыннылар.
Олимпиада түмүгүнэн 6-с кылаас оҕолорун икки ардыгар 1-кы миэстэни Чакыртан Матвеева Алиса, 2-с миэстэни эмиэ Чакыртан Федорова Кристина уонна Болугуртан Филиппов Эвсан ыллылар. 3-с миэстэ Амма Наахараттан Макарова Сайаана, Никифоров Слава уонна Болугуртан Местникова Сандаара тахсан үөрүүлэрэ үксээтэ. 7-с кылаастар икки ардыларыгар 1-кы миэстэни Болугуртан Новикова Айта уонна Кузьмин Мирон, 2-с миэстэни Амма Наахараттан Ефремов Дима уонна Болугуртан Шестакова Айураана, 3-с миэстэни Амма Наахараттан Мартынова Алгыстаана, Чакыртан Шепелев Маркел уонна Амма Наахараттан Мартынов Дамир ылан ситиһии кынаттаннылар. 8-с кылаастарга 1-кы миэстэҕэ Амма Наахараттан Устинова Күндүүнэ, 2-с миэстэҕэ Яковлева Далаана, 3-с миэстэҕэ Степанова Күндүүнэ, Егорова Яна уонна Болугуртан Филиппова Алиса, Матвеева Сайаана тахсан дьоҕурдаахтарын көрдөрдүлэр. Эбиэт кэннэ 6-7-с кылаастар икки хамаандаҕа арахсан матбой оонньоотулар. Кыайыыны Новикова Айта хамандыырдаах бастакы хамаанда ылла. Онтон 8-с кылаастар икки хамаандаҕа арахсан физматбой оонньоотулар. Кыайыыны Устинова Күндүүнэ хапытааннаах «Солнце» хамаандата ылла.
Олимпиадаҕа үчүгэй көрдөрүүлээх уонна матбойга үчүгэйдик кэпсиир, быһаарар оҕолор талыллан кулун тутар 6 күнүгэр Аммаҕа ыытыллар күрэххэ бу эҥэр оскуолаларын уопсай хамаандата буолан киириэхтэрэ. Күрэххэ кыттыбыт үөрэнээччилэр, оҕолору бэлэмнээбит учууталлар бэлиэ суруктары, грамоталары туттулар. Улууска ыытыллар күрэххэ үөрэнээччилэрбитигэр, саҥа талыллыбыт хамаандаҕа ситиһиилэри баҕарабыт.
Ирина КОРЯКИНА-ОЛЕСОВА