Киһи санаата көтөҕүллэригэр ардыгар бэрт кыра да наада эбээт. Холобура, бэҕэһээ эрэдээксийэ кэтэҕинэн Партизанскай уулуссаҕа тахсаарыбын саҥа кирилиэс баар буолбутуттан наһаа үөрдүм. Бу сыллар тухары теплотрассаны үрдүнэн сылдьар эрэйдээх соҕус буолааччы. Кыра оҕолор, саастаах дьон туһунан этэ да барыллыбат. Маны көрөөт, хайа үтүө санаалаах оҥорбут буоллаҕай диэн толкуйга түстүм.
Ыйыталаһан билбитим, теплотрасса чугаһыгар турар “Здоровье” аптека кэлэктиибэ буолан биэрдэ.
-Биһиэхэ доруобуйаларынан хааччахтаах, кырдьаҕас дьон элбэхтик сылдьаллар. Онуоха ити теплотрассаны кыайан туораабаппыт, ырааҕынан эргийэн сылдьарга күһэллэбит диэн наар этэллэр. Кинилэр кыһалҕаларын чэпчэтэр инниттэн сири тэҥнээн шлак куттаран, биригээдэ наймылаһан тупсаҕай кирилиэс оҥоттордубут, көстүүтүн тупсаран кырааскалаан кэбистибит. Онон дьон сылдьарыгар табыгастаах буолла,- диэн аптека салайааччыта Екатерина Дмитриевна Ефремова санаатын үллэстэр.
Икки эрэ киһиилээх дьоҕус кэлэктиип диэтэххэ, маладьыастар. Үтүө үлэҕит туһалаах, махталлаах, үйэлээх буоллун.
«Амма олоҕо» хаһыат.