«Дуораанчыктар» сахалыы балаҕаннаннылар

Амма улууһугар, Саха Өрөспүүбүлүкэтигэр биллэр үлэлээх Амма Наахара «Дуораанчык» уһуйаана быйылгы үөрэх сылыгар Арассыыйаҕа «Холобур буолар крдөрүүлээх уһуйаан» күрэх кыайыылааҕын аатын сүгэн эппиэтинэһэ өссө үрдээн турар. Үлэ күөстүү оргуйар уһуйаана саҥа дьиэлэнэн, тиэргэннэнэн, оҕо оонньууругар бөлөҕүнэн тус-туспа былаһааккаланан нэһилиэк ыраахтан сандаара көстөр тэрилтэтэ буолар.

Кэлэктииби барыгы сатабыллаах салайааччы, РФ уопсай үөрэхтээһинин Бочуоттаах үлэһитэ, РФ норуотун үөрэҕириитин туйгуна, СӨ үөрэҕириитин үтүөлээх үлэһитэ, Амма улууһун уонна Амма Наахара нэһилиэгин Бочуоттаах олохтооҕо Полина Петровна Кононова салайар.

Салайааччы тэрилтэтигэр бэйэни салайыныы, сайыннарыы хайысхатын тутан олороро тута харахха быраҕыллар. Оҕо күннэтэ үөрэ-көтө сылдьар уһуйааныгар үлэ таһымын үрдэтиигэ, оҕо сайдыытыгар, сынньанарга табыгастаах усулуобуйа оҥоһуллар. Биһиги уһуйааммыт биир сомоҕо үлэтинэн өссө сайдан, кэрэхсэнэр көстүүлээх, оҕо үөрэ-көтө сылдьар, сайдыы суоллаах Өрөспүүбүлүкэ таһымыгар сөп түбэһэр тэрилтэлэртэн биирдэстэрэ буолар.

Аҕыйах хонуктааҕыта уһуйаан тиэргэнигэр Саха балаҕана быһыылаах саҥа сыана тутуллан таҕыста. Бу оҕолор талааннарыгар таба тайанар, сыанаҕа тутта-хапта сылдьыыга дьыл сылаас кэмнэригэр үөрэнэр кииннэрэ буолара былааннанар. Тутууну уһуйаан күүстээх, сатабыллаах уолаттара Афанасий Михайлов, Алексей Тарскай, Давыд Алексеев, Евсей Никифоров, Виталий Тарскай, Александр Степанов, Николай Илларионов, Гаврил Александров тутан, күөрэтэн таһаардылар.

Барыга көхтөөх, үлэттэн толлон турбат уолаттарбыт тутууну кыһаллан туран эппит кэмнэригэр бүтэрбиттэрэ олус хайҕаллаах. Нэһилиэкпит үүнэ-чэчирии сайдарыгар сүҥкэн кылаат киллэрбит уолаттарбыт үлэлэрэ Саха сиригэр, Арассыыйаҕа иитэр-үөрэтэр сайтарга киирэн барыга үтүө холобур буолуо диэн эрэнэбит.

Ирина Корякина — Олесова.

Читайте дальше