Доруобуйаларынан хааччахтаах дьон декадаларын чэрчитинэн Амма улууһугар бииртэн-биир сонун тэрээһиннэр тиһигин быспакка ыытыллаллар. Бүгүн доруобуйалара хааччахтаах оҕолорго уонна кинилэр төрөппүттэригэр өй оонньуута буолла.
Араас нэһилиэктэртэн 8 дьиэ кэргэн кыһыҥҥы тымныы күннэр саҕаламмыттарын аахсыбакка айаннаан кэлэннэр „Колесо знаний“ үс түһүмэхтээх күрэҕин мүлчү түстүлэр. Улуус дьаһалтата, инбэлииттэр уопсастыбалара, киин библиотека, оҕо библиотеката тэрийбит сонун күрэхтэригэр нэһилиэктэрин чиэһин көмүскээтилэр – Алтантан Георгий уонна Константин Константинович Неустроевтар, Герман уонна Валентина Кимовна Неустроевтар, Амматтан Герман уонна Анна Моисеевна Акимовтар, Ванесса Мутчурукова уонна Тамара Владимировна Сметанина, Болугуртан Ангелина уонна Мария Васильевна Кузьминнар, Сайаана уонна Татьяна Дмитриевна Ефремовтар, Амма Наахараттан Юлия уонна Аля Викторовна Александровтар, Чапчылҕантан Дарина Ефимова уонна Анна Сергеевна Окоемова.
Бастакынан төрөппүттэр төрөөбүт дойдуларын историятын, биллиилээх дьонун төһө билэллэрин тургуттулар, иккис түһүмэххэ оҕолор биллэр остуоруйалар, мультиктар ис хоһооннорун төһө өйдүүллэрин бэрэбиэркэлэннилэр уонна үһүс түһүмэххэ „Тулалыыр эйгэм мин харахпынан“ диэн теманы арыйан уруһуйдааннар дьүүллүүр сүбэ иннигэр көмүскээтилэр.
Эрбии тииһин курдук эрийсиилээх күрэх түмүгүнэн саамай билиилээх хамаанданан Амматтан Герман, Анна Моисеевна Акимовтар ааттаннылар. Иккис миэстэҕэ Алтантан Герман, Валентина Кимовна Неустроевтар, үһүс миэстэҕэ Дарина Ефимова ийэтинээн Анна Сергеевналыын таҕыстылар. Кыайыылаахтар өйдөбүнньүк бириистэринэн, бары кыттааччылар сертификаттарынан бэлиэтэннилэр.
Көхтөөх күрэх минньигэс астаах остуолунан, фокусник ыалдьыттаах аралдьытыынан түмүктэннэ.
„Амма олоҕо“ хаһыат.