Эмистээҕи Е.А. Захарова-Саха Күөрэгэйэ култуура киинигэр улууска ыытыллар Олоҥхо дэкээдэтин чэрчитинэн ыытыллыбыт тэрээһиннэри түмүктүүр чаас бэрт сэргэхтик буолан ааста.
Үөрүүлээх чааска Эмис нэһилиэгин аҕа баһылыга Прокопий Бубякин эҕэрдэ тылын тириэрдэн туран Олоҥхо ыһыаҕар үлэлэспит, олоҥхону тарҕатыыга үлэлэһэ сылдьар дьоннорго улуус дьаһалтатын аатыттан Махтал суруктары, ону сэргэ олбох тигиитигэр көхтөөхтүк үлэлээбит нэһилиэк тэрилтэлэригэр, 100 миэтэрэ ситиини хатан, туоһунан киэргэтэн бэлэх ууммут Наталья Николаевна, Владимир Петрович Константиновтарга, Устинова Надежда Викторовнаҕа, Устинов Дмитрий Андреевичка улуус култуураҕа уонна норуот айымньытыгар салалтата анаабыт Махтал суруктарын туттарда.
“Бу сайын Олоҥхо ыһыаҕар күүстээх үлэ барбыта. Ону барытын бары түмсэн, биир сомоҕо буолан кыайдыбыт” диэн аҕа баһылык санаатын тириэртэ. Прокопий Петрович нэһилиэк биир киэн туттар “Эрэкэ-дьэрэкэ” фольклор бөлөҕө бу ахсынньы 14күнүгэр үбүлүөйүн бэлиэтиирин иһитиннэрдэ. Тэрээһиммит Матрена Владимирова салайааччылаах “Чэмэлик” фольклор бөлөҕө “Тойон Дьаҕарыма” олоҥхоттон быһа тардан толорууларынан түмүктэннэ. Бу күн нэһилиэккэ фольклор сайдыытыгар, олоҥхону тарҕатыыга кылааттарын киллэрбит дьон бары Махтал суруктарынан наҕараадаланнылар.
Эрчим Николаев, Эмис орто оскуолатын эдэр кэрэспэдьиэнэ