Эмистээҕи Е.А. Захарова — Саха Күөрэгэйэ аатынан култуура киинин уораҕайыгар «Өбүгэ ситимэ» норуот эмчиттэрин ассоциациятын чилиэнэ, Мэҥэ Хаҥалас улууһун Дархан оһуохай этээччитэ, тойуксут, олоҥхону толорооччу, сахалыы сиэри-туому тарҕатааччы, алгысчыт, эмчит, көрбүөччү, Дьабыл нэһилиэгин олохтооҕо, Денис Оконешников нэһилиэнньэни кытта көрүстэ.
Денис Оконешников Эмис нэһилиэк олохтоохторугар, оскуола оҕолоругар сиэр- туом туһунан бэрт элбэх интэриэһинэйи кэпсээтэ. Олохтоохтор сүрүн боппуруостарынан ыһыаҕы тэрийии, дьиэ-уот, бултааһын сиэрэ-туома буоллулар.
«Мин дьиэ-уот ыраастааһынын, айылҕа, сиэр-туом туһунан биллим. Хас биирдии саха ыала төрүт үгэстэрин билиэхтээх. Киһи ыраас санаатынан бэйэтин эйгэтин оҥостор буоллаҕына, куһаҕан санаа, дьайыы суох буолар эбит диэн өйдөөтүм уонна Денис Викторовичка кэлэн ыалдьыттаан сиэр-туом туһунан кэпсээбитигэр бэйэм махталбын тиэрдэбин»,- диэн ортооскуола учуутала Василиса Неустроева санаатын үллэһиннэ.
Ыалдьыппыт Денис Викторович көстүбэт эйгэнэн дьарыктаммыта 15 сыл буолбут. Ол тухары араас элбэх түгэннэр, быһылааннары көрөн ааспытын, инникитин өссө да көрүөм турдаҕа диэн этэр.
«Аан бастаан 7 -с кылааска сылдьан арыллан, күн бүгүҥҥэ диэри үлэлии сылдьабын. Эмис сиригэр кэлэн олус үчүгэй дьоҥҥо хонон, сынньанан тураммын күн устата үлэлээтим. Эһиги дойдугут ытык дойду буолан, оскуола оҕолоро олус үчүгэйдик иһиттилэр. Олохтоох дьону кытта кэпсэтэн, санаа атастаһан, олус үчүгэй таһаарыылаах кэпсэтии буолбутуттан олуһун үөрдүм, астынным. Санааҕытын түһэрбэккэ, эрэлгитин ыһыктыбакка өрүү үтүөнү, үйэлээҕи кэскиллээҕи тэнитэ сылдьыҥ, маҥан халлаан мааныта барҕарарын туһугар үлэни-хамнаһы өрө тутар үрүҥ халлаан үтүөтэ үллэн үксүүрүн туһугар үүнэр- сайдар ычаккытын сиэр -майгы өттүнэн иитэн- үөрэтэн таһааран, саха норуотугар көмөлөөх киэҥ көрүүлээх дьон буолалларыгар үлэлэһэннит, инникитин алгыстаах кэми салайсан, үтүө дьону иитэн таһаарын», — диэн алгысчыт баҕа санаатын тириэртэ.
Эрчим НИКОЛАЕВ, 9-с кылаас үөрэнээччитэ