Эмис нэһилиэгиттэн Ийэ Дойдуларын көмүскэлигэр турунан хас даҕаны олохтоох билигин анал байыаннай дьайыыга кытта сылдьаллар. Кинилэр дьиэ кэргэттэрэ хаһаайыстыба, олох-дьаһах өттүгэр уустуктары көрсүбэттэрин инниттэн нэһилиэнньэ кыаҕа баарынан өрүү көмөлөһөр. Ааспыт өрөбүлгэ амарах санаалаах дьон Петр Солдатов ийэтигэр кыстыыр маһын кэрдэн, соһон киллэрэн эрбээн, саһааннаан биэрдилэр.
Петр Солдатов Армия кэккэтигэр сулууспалыы сылдьан хантараак баттаһан Дойдутун көмүскүүр кытаанах санааны ылыммыта. Уоттаах кыргыһыыга бааһырыыны ылан билигин Москва куоракка госпитальга эмтэнэр. Оттон биир дойдулаахтара уолларын ийэтин соҕотохтуу хаалларбакка, туох наадатынан көмө, өйөбүл буолаллар.
-Нэһилиэкпит урбаанньыта Остап Петрович Дмитриев ыҥырыытын быһа гыммакка, нэһилиэкпит баһылыга Прокопий Бубякин, итиэннэ Леонид Солдатов, Василий Прохоров бэҕэһээ кыстык маспын бэлэмнээн биэрэннэр улаханнык абыраатылар. Тыа сирин киһитигэр тымныы кыһыны сылаастык туорааһын саамай улахан кыһалҕа буоллаҕа. Онон биир дойдулаахтарбар махталым муҥура суох, дурдалаах-хаххалаахкурдук сананным. Кинилэр дьиэ кэргэттэригэр дьолу, эйэлээх олоҕу баҕарабын,- диэн Владилена Солдатова хаһыат нөҥүө өссө төгүл дириҥ махталын биллэрэр.
“Амма олоҕо” хаһыат.