Дойдубутугар улахан суолталаах, инники сайдыыбытын түстүүр быыбар чугаһаатар чугаһыыр. Ол инниттэн учаастактааҕы быыбардыыр хамыыһыйалар үлэлэрэ тэтимирэр. Эмистээҕи 57-с №-дээх быыбардыыр хамыыһыйа чилиэннэрэ Нонна Ноговицына, Саргылана Васильева уонна хамыыһыйа бэрэссэдээтэлэ Прасковья Бубякина олунньу 17 күнүттэн түөлбэлэринэн кэрийэ сылдьан хас биирдии ыалга сылдьан “Информ-УИК” бырагыраамаҕа олоҕуран сырдатар, өйдөтөр үлэни ыыта сылдьаллар.
“Биһиги куоластааһын туһунан ыйытыктары биэрэн, быыбардааччы олорор аадырыһын чуолкайдыыбыт. Хайдах куоластыахха сөбүн, хайдах көрүҥүнэн куоластыахха сөбүн кэпсиибит. Сылдьыбыт аадырыстарбытыгар кырдьаҕас өттө, эдэр даҕаны дьон уруккулуу быыбардыыр учаастакка тиийэн куоластыыры биллэрдилэр. Сорох эдэр дьон дьиэттэн даҕаны куоластыахпыт дэстилэр. Дойдубутугар билиҥҥи политическай олоххо тэҥҥэ хардыылаан, куоластыыр бырааппытынан пааспарбытын туппутунан куоластааһыҥҥа кыттыахпыт дэстилэр. Билиҥҥи туругунан 50 ыалга сырыттыбыт. Аны 83 ыалга сылдьарбыт хаалла. Бу үлэбит сүрдээх эппиэтинэстээх, хас биирдии быыбардааччы кэлэн дойдубут инники дьылҕатын түстэһэригэр, өйдүүрүгэр кыһаллан үлэлии сылдьабыт. Сылдьыбыт дьоммут бары ханнык быыбар буоларын, кини суолтатын өйдүүллэр уонна маннык сылдьан кэпсиир үчүгэй диэн сэргииллэр”, — диэн Эмистээҕи 57-с N-дээх быыбардыыр хамыыһыйа бэрэссэдээтэлэ Прасковья Бубякина сырдатар.
“Амма олоҕо” хаһыат