Эмис нэһилиэгэр Аан дойду Дьахталларын күнүн көрсө “Көхтөөх буол” диэн тэрилтэлэр икки ардыларыгар спорт хас да көрүҥэр күрэхтэһии ыытыллынна. Бу күрэххэ тэрилтэлэр кэрэ аҥардар кииристилэр. Кимнээх инники түстүлэр?
«Көхтөөх буол» диэн нэhилиэк тэрилтэлэрин икки ардыларыгар ыытыллыбыт күрэх бэйэтэ кыра спартакиада курдук барда. Күрэххэ орто оскуола үс, “Чуораанчык” уhуйаан икки хамаандалары туруордулар. Ону сэргэ балыыhа, дьаhалта, бибилэтиэкэ, култууратын дьиэтин хамаандалара күөн көрүстүлэр. Онон биэстии киhилээх уопсайа 8 хамаанда кытынна. Хамаандалар уксааҥҥа, дартска, ытыыга, “эмисский бадминтон” диэн бэйэлэрэ толкуйдаабыт күрэхтэригэр уонна имигэс буолууга кииристилэр.
Судьуйаларынан Валентин Павлович Николаев, Айза Сергеевна Новикова, Алексей Ильич Гаврильев, Анна Александровна Ларионова үлэлээтилэр. Көрүҥнэринэн бастаабыттар, кыайыылаахтар олохтоох дьаhалта, култуура дьиэтэ туруорбут бириистэринэн наҕараадаланнылар. Күүстээх киирсиилэр кэннилэриттэн кыайыылаахтарынан дьэ кимнээх буоллулар? Ол курдук култуура дьиэтэ кыайыылааҕынан таҕыста. Иккис миэстэҕэ «Универсал» диэн орто оскуола, үһүс миэстэҕэ «Мотокуолар» диэн “Чуораанчык” уhуйаан хамаандалара ыллылар.
“Күрэх уратыта бу ыытыллыбыт мини спартакиадабытыгар спортивнай тэрээhиннэргэ урукку өртүгэр кыттыбатах кэрэ аҥардар кыттыбыттара буолар. Сыала-соруга диэн нэһилиэнньэни спортка тардыы, угуйуу, спордунан дьарыктанар киһи ахсаана элбиирин ситиhии буолар”, — диэн нэһилиэк баһылыга Прокопий Бубякин билиһиннэрдэ.
“Амма олоҕо” хаһыат