Балаҕан ыйын 25 күнүгэр Арассыыйаҕа эми-тому оҥорор фармацевт идэлээх дьон бэйэлэрин идэлээх бырааһынньыктарын бэлиэтииллэр. Эми аптекаларга анал үөрэхтээх фармацевт, эбэтэр провизор атыылыыр. Тыа сиригэр аптека үлэлэтэр уустук. Манна эми кытта сыһыаннаах, дьон ыйытар, мунаахсыйар кэмигэр сөптөөх эппиэттэри биэрэр киһи үлэлиир. Провизор идэлээх, Амма нэһилиэгин бочуоттаах олохтооҕо Наталья Шишигина нэһилиэнньэ күннэтэ наадыйар эмтэрин атыылаабыта хаһыс да сылыгар барда. Кини бастыҥ үлэлээх Амма биир инники турар урбаанньыта буолар.
«Бэйэм провизор идэлээхпин. Идэбинэн үлэлээбитим быйыл 39-с сыла буолла. Киһи аптечнай пууну аһарыгар анал көҥүлү ылыахтаах уонна онно дьиэтэ-уота барыта сөп түбэһиэхтээх. Эми ыллыҥ даҕаны мээнэ атыылаабаккын, барыта көҥүллээх буолуохтаах. Билиҥҥи туругунан биһиэхэ каадыр өттүнэн ыарахаттардаах. Ол курдук, анал үөрэхтээх эрэ киһи аптекаҕа үлэлиир. Эми атыылыыр эппиэтинэстээх, элбэх ирдэбиллээх, быраабылалаах. Үгүс эмтэр быраас анаатаҕына атыыланаллар, рецеба суох бэриллибэт эмтэр эмиэ бааллар. Билигин ыччат дьон үксэ киин сиргэ куоракка талаһар. Аптекаҕа үөрэҕи саҥа бүтэрэн кэлбит исписэлиис дьупулуома эрэ буолбакка, кини анал сэртипикээттээх буолуохтааҕа хайаан даҕаны ирдэнэр. Үлэлээбит сылларбыт тухары нэһилиэнньэни төһө кыалларынан наадыйар эмтэринэн хааччыйа сатыыбыт. Эрдэттэн сакаас оҥорон үлэлиибит. Биир идэлээхтэрбин барыларын фармацевт күнүнэн итиитик-истиҥник эҕэрдэлиибин«, — диэн Наталия Ивановна санаатын тириэртэ.
Артем ОСИПОВ