Амма нэһилиэгэр “Фаворит” бильярднай кулуубугар Чакыр ыччата Федор Григорьев сырдык кэриэһигэр анаммыт улуустааҕы бильярдка күрэх үрдүк тэрээһиннээхтик буолан ааста. Күрэххэ улуус 8 нэһилиэгиттэн 50 саастарыгар диэри 17, 50-тан үөһээ саастаах бэтэрээннэргэ 19 киһи регистрацияны ааһан күн устата тура тэбинэн туран күрэхтэстилэр. Бэлиэтээн эттэххэ, бэтэрээннэр ортолоругар үс кэрэ аҥар ону кытта икки доруобуйаларынан хааччахтаах дьон бааллар. Кинилэр бары спортсменнары кытта тэбис тэҥҥэ хаалсыбакка кииристилэр. Турнир бириистэрин Чакыр нэһилиэгин дьаһалтата, Федор Григорьев аймахтара, бииргэ үөрэммит доҕотторо, бииргэ сулууспалаабыт табаарыстара, доҕотторо туруордулар.
Федор Григорьев 1984 сыллаахха күн сирин көрбүтэ. 2001 сыллаахха Чакыр орто оскуолатын үөрэнэн бүтэрбитэ. Оҕо эрдэҕиттэн сытыы-хотуу, бэйэтин кыанар уол этэ. Кини уһанарын сөбүлүүрэ. Нэһилиэк олоҕор көхтөөхтүк кыттара. Федор биир сөбүлүүр дьарыгынан бильярд буолара. Чакыр нэһилиэгин хамаандатыгар киирсэн нэһилиэгин чиэһин куруутун көмүскүүрэ, бириистээх миэстэлэргэ тиксэр этэ.”Алмазы Анабара” тэрилтэҕэ тутааччы быһыытынан үлэлээбитэ. Онно үлэлии сылдьан бильярд күрэҕэр бастакы миэстэни ылбыта. Тэрилтэтигэр бастыҥ үлэһитин көрдөрөн, уопсастыба үрдүкү салалтатын Бочуотунай грамотатынан уонна 50 000 солк харчынан бириэмийэлэммитэ. Чакыр биир чаҕылхай уолун сырдык аатыгар ыытыллар аһаҕас турнирга бэйэлэрин эҕэрдэлэрин Чакыр нэһилиэгин баһылыга Прокопий Прокопьев, Федор күн күбэй ийэтэ Аянна Григорьева уонна “Фаворит” бильярднай кулууп салайааччыта Григорий Аммосов тириэртилэр. Турнир кылаабынай судьуйатынан Игнатий Гаврильев үлэлээтэ.
Тыҥааһыннаах киирсиилэр кэннилэриттэн 50-гар диэри саастаахтарга үһүс миэстэни ылбыт Амматтан Алексей Пахомов Чакыр нэһилиэгин дьаһалтата олохтообут походка илдьэ сылдьар остуолунан, онтон Афанасий Максимов Федор бииргэ төрөөбүттэрэ уонна аймахтара туруорбут афганскай казанынан наҕараадаланнылар. Иккис миэстэни Мичил Пахомов ылан бииргэ үөрэммит табаарыстарыттан палатка бэлэх ылла. Эдэрдэргэ кыайыылаах тахсыбыт Валерий Кириллин аймахтар туруорбут элекрогенератордарын хаһаайына буолла. Онтон бэтэрээннэргэ, ол эбэтэр 50 саастарыттан үөһээ саастаахтарга үһүс миэстэҕэ Амматтан 73 сааһыгар сылдьар Константин Максимов уонна Амма Наахараттан төрүттээх Петр Гермогенов тахсаннар Чакыр нэһилиэгин дьаһалтатын бирииһинэн, иккис миэстэҕэ Алексей Григорьев тахсан табаарыстара туруорбут сварочнай аппаратынан уонна бастакы миэстэҕэ Амматтан Игнатий Гаврильев тахсан Федор бииргэ үөрэммиттэрэ туруорбут эрэһиинэ оҥочотунан уонна анал Кубогынан наҕараадаланнылар.
Кыайыылаахтары сэргэ өссө турнир анал ааттара олохтоннулар. Ол курдук Федор бииргэ сулууспалаабыттара “Саамай кырдьаҕас оонньооччу” диэн анал аакка «Штиль» диэн бензининэн барар эрбии бириис туруорбуттарын Болугуртан сылдьар Петр Устиновка туттардылар. Онтон бииргэ үөрэммиттэрэ турнир “Саамай эдэр кыттааччы” анал аакка бириис туруордулар уонна бу бирииһи Чакыртан Айтал Максимов ылла. Ону сэргэ «Кыайыыга дьулуурун иһин» бириис олохтонон, доруобуйатынан хааччахтаах оонньооччуга, Эмистэн сылдьар Владимир Даниловка туттарылынна.
Маны сэргэ эдэрдэргэ алта шаригы тохтоло суох киллэрэн “Серия забитых шаров” диэн анал бирииһинэн Амматтан Алексей Пахомов уонна бэтэрээннэр ортолоругар Алексей Григорьев наҕараадаланна. Чакыртан Василий Васильев “”Сайдан иһэр оонньооччу” диэн бирииһи тутта. Федор Григорьев дьиэ кэргэнэ анал ааттары сэргэ кэлэн иһэр Аан дойду дьахталларын күнүнэн бильярд турнирыгар кыттыбыт Эмистэн Галина Куприяноваҕа, Нонна Ноговицынаҕа, Сатаҕайтан Дария Стручковаҕа бэйэлэрин анал бэлэхтэрин туттардылар.
Григорьевтар дьиэ кэргэн чугас киһилэрин сырдык аатыгар ыытыллыбыт турнир үрдүк таһымнаахтык ааспытын бэлиэтээн, онтон олус үөрэн, долгуйан туран «Фаворит» бильярднай кулууп хаһаайыныгар Григорий Аммосовка, эдэр ыччат дьарыктаах, спортка тардыһыылаах буолуутугар кыһаллан улахан кулууп арыйан улэлэтэ турарыгар барҕа махталларын тириэртилэр.
“Амма олоҕо” хаһыат