Үрдүк категориялаах социальнай педагог, СӨ үөрэҕириитин туйгуна, “Амма олоҕо” хаһыат эрэллээх көмөлөһөөччүтэ Саргылаана Мартынова – Аналлаана “Оҕо сааспын саныыбын” уус-уран кинигэтин тутан үөрэ олоробун. Ааптар саҥа күн сирин көрбүт үһүс кинигтигэр күннэтэ сэһэргэһэр, үөрэ-көтө “эн-мин” дэһэр биир дойдулаахтарын оҕо саастарын умнуллубат түгэннэрин сурукка тиһэн үйэтиппитин киһи биир тыынынан ааҕар.. Саргылаана Ивановна төрөөбүт Бөтүҥүн түөлбэтин айар дьоҕурдаах дьонун хоһооннорун хомуурунньук гынан таһаарбытын бу саас эрэ киэҥ эйгэҕэ билиһиннэрбитэ. Оттон бастакы көччөх гынан көтүппүт «оҕотунан» бэйэтин хоһооннорун кинигэтэ этэ.
«»Оҕо сааспын саныыбын» кинигэ икки түһүмэхтэн турар. “Оҕо сааспыт кырдалынан” диэн бастакы түһүмэх аҕа саастаах ытык дьон, нэһилиэк, улуус, өрөспүүбүлүкэ үлэһит дьонун, уопсайа 17 ахтыыны түмтэ. “Оҕо сааһым сибэккилээх хонуутунан” иккис түһүмэх автобиографическай хабааннаах. Ааптар оҕо сааһын ахтыы-кэпсээнэ дьиэ кэргэн арбыыттан хаартыскаларынан ситэриллэн сиппит-хоппут. “Айар” кинигэ кыһатыгар 100 ахсаанынан бэчээттэмит кинигэҕэ маны сэргэ Саргылаана Ивановна аҕата — биллиилээх суруналыыс, суруйааччы, сэрии кэмин оҕото Уйбаан Бөтүүнүскэй кыһарҕаннаах сэрии кэмнэрин, өрөгөйдөөх Кыайыы түгэнин туһунан суруйбут кэпсээннэрэ, ахтыы кэпсээнэ киирдилэр.
Бөтүҥ орто оскуолатын социальнай педагогунан өр сыл үлэлээбит Саргылаана Мартынова – Аналлаана СӨ үөрэҕириитин туйгуна буоларын кэккэ аҕатыттан бэриллибит айар дьоҕурдаах, улуус хаһыатын общественнай кэрэспэдьиэнэ, 2016 сыл түмүгүнэн “Бастыҥ уопсастыбаннай кэрэспэдьиэн” анал аат хаһаайына. Хаһыат бүтэр уһуга биллибэт үлэтин эрэллээх көмөлөһөөччүтэ үс кинигэ ааптара буоларын сэргэ 8 кинигэ тахсыытыгар үлэлэспит өҥөлөөх. Билигин “Кыһыл Кэккэ” кинигэ оҥоруутугар Социалистическай Үлэ Геройа Анна Васильева – Сэбиэт Аана төрөппүт уолун Ванифадий Васильевы кытта үлэлэһэ сылдьар. Онон сынньанар, олорон көрөр диэн билбэт айымньылаах киһи. Саргылаана Ивановнаҕа өлбөт үйэлээх үлэтигэр ситиһиилэри, тулууру, өссө даҕаны үгүс үлэлэрэ күн сирин көрөллөрүгэр баҕарабыт.
Елена АЛЕКСАНДРОВА.