Абаҕа нэһилиэгин олохтооҕо Станислав Устинович Максимов анал байыаннай дьайыыга кытта сылдьан хорсуннук охтубутун туһунан курус иһитиннэрии кэлэн чугас дьонун, улуус бары олохтоохторун аймаабыта. Хорсун саллааты бу күннэргэ дойдутугар аҕалан чиэстээхтик ийэ буоругар кистээтилэр. Биир дойдулаахпыт анал байыаннай дьайыыга сылдьан бэйэтин үчүгэй эрэ өртүттэн көрдөрөн, байыаннай салалта өртүттэн хайҕабылы эрэ ылбыта. Станислав туһунан чугас дьонун суругуттан, билиһиннэриэхпитин баҕарабыт.
“Максимов Станислав Устинович кулун тутар 1 күнүгэр 1989 сыллаахха Устин Николаевич уонна Марианна Коммунаровна Максимовтар дьиэ — кэргэҥҥэ бастакы оҕонон күн сирин көрбүтэ.
Аҕата кини биэс сааһыгар сырыттаҕына соһумардык бу олохтон барбыта. Иккис кылаастан Соморсуҥҥа көһөн кэлэн, 9-с кылааһы бүтэрбитэ.
“Стасик Соморсун орто оскуолатыгар 2-с кылаастан 9-с кылааска диэри үөрэммитэ. Кылааска 18 оҕо баара. Онтон 7 кыыс, 11 уол этилэр. Кини кэлэктиипкэ олус түргэнник киирбитэ. Кыра эрдэҕиттэн аймахтарын кытта билсэр буолан, оҕолору да билэттиирэ. Аймахтарыгар олорон үөрэммитэ. Эйэҕэс истиҥ кэпсэтиини олус сөбүлүүрэ. Аймахтарын олус убаастаан истиҥник кэпсиирэ. Үөрэҕэр орто этэ. Көтүтүүтэ элбэх быһыылааҕа. Ону оҕолор көмөлөһөн, бэйэтэ кыһаллан 9-с кылааһы бүтэрбиппит. Майгыта көнө, холку буолан табаарыстарын уонна улахан дьону кытта сыһыана үчүгэйэ. Эт- хаан өттүнэн үчүгэй сайдыылаах, бэйэтин кыанар олус спортивнай этэ. Онон оскуолаҕа, улууска ыытыллар спортивнай күрэхтэһиилэргэ көхтөөхтүк кыттара, оскуолатын чиэһин көмүскүүрэ. Үөрэммит сылларыгар бэйэтин үчүгэй эрэ өттүнэн көрдөрбүтэ. Стасигы оҕолор олус убаастыыллара, иллээхтик улааппыттара. Эрэллээх табаарыс, доҕор этэ», — диэн кылаас салайааччылара Дария Николаевна Нестерева, Галина Иннокентьевна Кутукова уонна Валентина Николаевна Софронова истиҥник ахталлар.
Стасикпытын бу курдук үтүө тылынан ахтар Соморсун орто оскуола коллективыгар, учууталларга уонна чуолаан дириэктэринэн үлэлээбит Кононова Василиса Иннокентьевнаҕа биһиги дириҥ махталлаахпыт. Стасикпыт күлүм курдук олорбут кылгас олоҕор кэргэннэнэр, аҕа буолар дьолу билэн, Аллочка диэн кыыс оҕолоох.
2022 сылга баҕа өттүнэн Украинаҕа буола турар анал, байыаннай дьайыыга барбыта. Быһаарыныыта кытаанах, бүтэһиктээх этэ. Онон туох наадатынан тэрийсэн, барыта этэннэ буолуоҕар эрэнэ, көрдөһө уолбутун атаарбыппыт. Стасик тиийээт даҕаны, үөрэтиини ааһар кэмигэр бэйэтин эт- хаан өттүнэн кыанарын, бэргэнник ытарын командование бэлиэтии көрбүтэ. Ол туһунан Стасикпыт биһиэхэ суруйбута. Бииргэ сылдьар дьоно кинини эмиэ оннук ылыммыттарыттан, үчүгэйдик сылдьарыттан арыый уоскуйан, уолбутунан киэн туттубуппут. «Баҕар снайперынан, эбэтэр танка хамандыырынан барар буоллум быһыылаах» диэн биллэрбитэ эрээри, сотору кэминэн, анал разведовкалыыр сорудахтарга сылдьар эбитин билбиппит. Ахсыа буолан сорудахха баран бараннар, утарылаһааччыларга түбэһэннэр, суукканы быһа сыыллан, сүүрэн, соҕотоҕун төннөн кэлбитин кэпсээбиттээх. Онтон уоппуска биэрэннэр 10 хонукка сынньана кэлэн барбыта…
Онтон атырдьах ыйын 3 күнүгэр оҕобут, Аҕа дойдутун иннигэр ытык иэһин чиэстээхтик толоро сылдьан, кыргыһыы толоонугар геройдуу охтон, сырдык тыына быстыбыта. Бу дойдуттан букатыннаахтык арахсарыгар Стасикпыт, бэйэтин- дьиннээх эр киһилии булгуруйбат хорсунун көрдөрөн, үтүө аатын ааттатан, дойдутун устуоруйатыгар аатын- суолун улахан, көмүс буукубанан суруйтаран хаалларда. Ол туоһутунан, Российскай Федерация сэбилэниилээх күүстэрин, Байыаннай- морской пехотатын 30926 войсковой чааһын байыаһа буолан, хорсун быһыытынан холобурга сылдьыбытын бэлиэтэ «Орден Мужества» судаарыстыбаннай наҕараадата буолар. Биири этиэхпитин баҕарабыт. Судаарыстыба бэйэтин буойуннарын чиэстээхтик харайар эбит. Ол курдук оҕобутун тиһэх суолугар атаарса, байыаннай чааһыттан икки арыалдьыт кэлсэннэр, Российскай Федерация былааҕынан хоруобун сабан, Российскай Федерация оборонатын министиэристибэтин уонна Саха өрөспүүбүлүкэтин салалтатын анал веноктарын уураннар, полиция сотрудниктара бырастыылаһар ытыынан автомат эһэннэр буойуну буойуннуу ийэ буорун буллардылар.
Биһиги ис сүрэхтэн махтал тылларын оҕобутун аҕалыыга күүс-көмө буолбут оҕобут бойобуой доҕотторугар, сулууспалаабыт чааһын командованиетыгар, Ил Дарханыгар Айсен Сергеевич Николаевка, биир дойдулаахпытыгар Пётр Иннокентьевич Лебедевка, улууспут баһылыгар Степан Николаевич Кузьмиҥҥа, өрөспүүбүлүкэ уонна Амма улууһун байыаннай комиссариаттарын үлэһиттэригэр, Абаҕа нэһилиэгин дьаһалтатыгар, олохтоохторугар уонна бары аймах- билэ дьонугар, доҕотторугар барҕа махталбытын тиэрдэбит”, — диэн Станислав аҕатын бииргэ төрөөбүттэрэ, кинилэр оҕолоро, быраата Максим, ийэтэ Марианна Коммунаровна, абаҕалара Константин Максимов, таайдара Дмитрий Наумов суруйаллар.
Хорсун саллаат, ыараханнартан чугуйбатах, “Хорсун быһыы” уордьаннаах Станислав Максимов сырдык аата умнуллубат.
Ааптар: “Амма олоҕо” хаһыат