Хортуоппуй улахан хаһаайыстыбата ыһыытыгар былаан быһыытынан киирдэ

Амма улууһун эрэ буолбакка,  өрөспүүбүлүкэ улуустарын эмиэ сиэмэ хортуоппуйунан хааччыйар Александр Фомин салайааччылаах бааһынай хаһаайыстыба бүгүҥҥэттэн ыһыытын саҕалаата.


“Ыһыыга бэлэммит уонча күн аннараа өртүгэр саҕаланан, былааннаммытын курдук бэс ыйын 1 күнүгэр саҕалаатыбыт. Бааһынаны бэлэмнээһиҥҥэ алта техника үлэлээтэ. Икки улахан уонна 4 кыра МТЗ тыраахтырдар. Уопсайа 65-70 гектар сир оҥоһуллубута. Олордууга икки техника үлэлиэ. Ыһыы үлэтигэр 6-7 буолан үлэлии сылдьабыт. Билигин 195   тонна сиэмэ хортуоппуй бааһынаҕа киирэн кытыыга сылыйа тураллар. Быйыл үс суорт хортуоппуйу олордобут. Ол курдук Омскай уобаластан 50 тонна супер элита “Розара”, ону сэргэ Татарстан өрөспүүбүлүкэтин Казань куоратыттан эмиэ 50 тонна элита “Розара“ суортары  аҕалбыппыт. Маны таһынан бэйэбит “Гала” суорпут 70-тан тахса тонна, эмиэ бэйэбит “Тулунский” суорпут баар. Ону таһынан ЯНИИСХ-тан   супер элита  “Тулунский ранний” суорт. “Гала“ суорт иккис репродукция буолар. Күн-дьыл үчүгэй. Онон этэҥҥэ буоллаҕына биэс күнүнэн бүтэрэр баҕалаах үлэлии сылдьабыт. Уу ыстарар анал тэриллээхпит. Манан 65 гектарыттан 40 гектарын өр кураанныыр түгэнигэр ыстарабыт”,  — диэн Александр Константинович билиһиннэрдэ.

Фоминнар хаһаайыстыбалара Амма улууһун барытын, ону тэҥэ өрөспүүбүлүкэ хас да улууһун сиэмэ хортуоппуйунан хааччыйар. Бу өттүгэр кинилэр былааннаахтык үлэлииллэр. Улахан, 500 тонна хортуоппуй киирэр бары ирдэбиллэргэ  эппиэттиир харайар сирдээх буолан, сиэмэ хаачыстыбата үчүгэй. Быйыл 80-90 тонна сиэмэ хортуоппуйу өрөспүүбүлүкэ улуустарыгар тарҕаттылар. Ол иһигэр  халаан уутуттан эмсэҕэлээбит Нам улууһугар Александр Константинович  хаһаайыстыбата 1 тонна сиэмэ  хортуоппуйун ыыппыттара. Ону сэргэ эмиэ көмө бэрээдэгинэн Амма 1№-дээх оскуолатыгар 1 тонна сиэмэ хортуоппуйу биэрдилэр.

“Амма олоҕо” хаһыат

Читайте дальше