Саха өрөспүүбүлүкэтин бастакы Президенэ М.Е. Николаев көҕүлээһининэн 2015 сыллаахтан үлэлиир “Бары уруһуйдуубут” диэн үүнэр көлүөнэни искусство кэрэ эйгэтигэр чугаһатар бырайыак эстафетатын анал кубогын И.И. Константинов аатынан Сулҕаччы орто оскуолатыгар көрүстүлэр.
Манна даҕатан эттэххэ, эстафета кулун тутар 22 күнүгэр Нам улууһун И.Е. Винокуров аатынан педагогическай колледж коллектива саҕалаабыта уонна аан бастакынан кубогы Хаҥалас улууһугар илдьэн туттарбыттара. Эстафета кубога республика бары улуустарын оскуолаларын кэрийэр, бу күннэргэ Амма улууһугар ыалдьыттыыр. Биһиги оскуолабыт эстафета кубогын М.Н. Сибиряков аатынан Сэргэ-Бэс оскуолатыттан тутта.
Тэрээһиммит үөрүүлээх чааһыгар Сулҕаччы орто оскуолатын директора Иван Григорьевич Окороков уонна нэһилиэкпит, улууспут, республикабыт киэн туттар норуоттан тахсыбыт талааннара: РФ уонна СР худуоһунньуктарын айар сойууһун чилиэнэ, Амма улууһун бочуоттаах олохтооҕо, СР культуратын туйгуна Николай Николаевич Рязанскай, оскуола информатикаҕа уонна физикаҕа учуутала, СР үөрэҕириитин туйгуна, РФ худуоһунньуктарын айар сойууһун чилиэнэ Розалия Петровна Винокурова кыттыыны ыллылар уонна эҕэрдэ тылы эттилэр. Дохсун ытыс тыаһынан эстафета кубога уруһуй уонна технология учууталыгар Иосиф Афанасьевич Стручковка туттарылынна.
Дьоро күнү үөрэнээччилэр уонна төрөппүттэр оҥорбут үлэлэрин, уруһуйдарын быыстапката киэргэттэ. Биир кэрэхсэбиллээҕэ, художник Николай Рязанскай оҕолорго, учууталларга уонна кэлбит дьоҥҥо Сулҕаччы айылҕатын, суруйааччы убайбыт, поэт Семен Семенович Капитонов хоһооҥҥо хоһуйбут “Ытык көлүйэ” хартыынатынан челлендж ыыппыта буолла, хартыынаны 60 квадратка үллэрэн туруордулар. Ким баҕалаах, ол эбэтэр үөрэнээччилэр, учууталлар төрөппүттэр художник оригиналын көрөн, үтүктэн, 1-дии, 2-лии клетканан кырааска түһэрэн, хартыына оҥорон таһаардылар.
Уруһуйдуон баҕалаах оҕо элбэҕэ худуоһунньугу үөртэ. Оҕолор даҕаны биллиилээх худуоһунньуктан кыраасканы кырааскаҕа буккуйан өҥ дьүөрэлииргэ, киистэни хайдах тутарга тиийэ сүбэ-ама ылан астынан тарҕастылар. Маны таһынан РФ худуоһунньуктарын айар сойууһун чилиэнэ Розалия Винокурова бэйэтин хартыыналарынан презентация оҥорон көрдөрдө, кини оҕолорго анал үөрэҕэ суох, ол эрэн уруһуйдуур дьоҕурдаах уонна баҕалаах дьону түмэр “искусство наив” хайысха туһунан билиһиннэрдэ.
Ити курдук үөрэнээччилэ да, кэлбит төрөппүттэр да элбэҕи билэн, сонун тэрээһинтэн сэргэхсийэн тарҕастылар. Сулҕаччы улахан худуоһунньуктар түөлбэлэрэнэн биллэр дойду, онон саҥа саҥа, эдэр талааннар тахсыахтара диэн эрэнэбит.
Елена ПОПОВА.