Х. Максимов аатынан Сулҕаччытааҕы культура уонна сынньаналаҥ киинин иһинэн “Иис кистэлэҥэ” куруһуок 2022 сылтан үлэлиир. Нэһилиэк 20 уран тарбахтаах иистэнньэҥ дьахталларын культура киинин директора Жанна Максимова бэйэтин тула түмэ тардыбыта.
Иис куруһуогун үлэтэ саҕалыаҕыттан айар дьоҕурдаах Екатерина, Саргылана Рязанскаялар, Татьяна Никитина, Раиса Константинова, Евдокия Данилова, Милана Ксенофонтова, Степанида Никитина, Матрена Никифорова, Надежда Владимирова, Александра Протодьяконова төһүү күүс буолаллар. Кинилэргэ талааннаах иистэнньэҥнэр Лена Неустрова, Туйаара Неустроева, Роксана Стручкова, Сардаана Сазонова, Оксана Бурцева, Александра Константинова, Антонина Неустроева уо.д.а. кыттыһан күүс-көмө буолаллар.
Талба талааннаахтарбыт кыбытык ньыманан ат симэҕин толору тигэннэр, 2023 сыллаахха “Дьөһөгөй оҕотун маанылаах симэҕэ” – улуустааҕы күрэххэ Кылаан бириис ылбыттара. Бу симэҕинэн 2023 сылга Өймөкөөкөөҥҥө ыытыллыбыт республиканскай Олоҥхо ыһыаҕар улуус аатыттан кыттыбыттара уонна анал аат ылбыттара.
Сэргэ-Бэс кулуубар маннык ис-хоһооннох иис куруһуога эмиэ ситиһиилээхтик үлэлиир. Барыта 12 иистэнньэҥ дьарыктанар. Салайааччылара — Светлана Федотова.
Билигин иистэнньэҥнэр аны сайын Аммабытыгар буолаары турар өрөспүүбүүлкэтээҕи Олоҥхо ыһыаҕар анаан214 олбох тигиитигэр, 400 м. ситии өрүүтүгэр ылсан үлэлии сылдьаллар.
Елена ПОПОВА.