Икки улуус бильярдка күрэхтэстэ

Амматааҕы «Фаворит» бильярд кулуубугар Мэҥэ Хаҥаластан Төхтүр нэһилиэгэ уонна Амма улууһуттан Амма нэһилиэгин хамаандаларын доҕордуу көрсүһүүлэрэ буолла. Көрсүһүү түмүгүнэн хайа хамаанда инники түстэ?


«Фаворит» кулууп салайааччыта Григорий Аммосов иһитиннэрбитинэн, тохсунньу 18 күнүгэр Аммаҕа Мэҥэ Хаҥалас улууһуттан Төхтүр нэһилиэгин 11 киһилээх хамаандата кэлэн быйылгы сылга табаарыстыы көрсүһүүлэрэ ыытылынна.

«Биһиги былырыын кинилэргэ баран күрэхтэспиппит. Онно эмиэ 11 киһилээх баран, биир киһибит иккитэ оонньообута. Ол курдук хамаандалар 12-лии киһилээх буолаллар. Бу сырыыга кинилэр эмиэ 11 буолан кэлэн, олохсуйбут быраабыланан оонньоотубут. Күрэхтэһии үс көрүҥүнэн барда. Бэрт сытыы киирсиилэр буоллулар. Хас биирдии көрүҥҥэ оонньуурга 40-нуу мүнүүтэ бэрилиннэ. «Свободнай пирамида» -ҕа Амма хамаандата 192 шаары, Төхтүр хамаандата 153 шаары киллэрдэ. Иккис көрүҥмүт «Динамичная пирамида» диэҥҥэ буолла. Манна аммалар 141 шаарданнылар, төхтүрдэр 95 шаар. Үһүс көрүҥмүт «Комбинированная пирамида» диэн. Манна Амма хамаандата 108, Төхтүр хамаандата 113 шаарданнылар. Дьэ онон уопсайа үс көрүҥ түмүгүнэн аммалар 441, төхтүрдэр 361 шаары киллэрдилэр. Дьэ онон бу сырыыга Амма хамаандата 80 шаарынан чорбойон таҕыста. Онтон ааспыт сылга биһиги 3 шаарынан хотторон кэлбиппит. Ыаллыы сытар улууспутуттан бастыҥ оонньооччулары бэлиэтээтибит. Ол курдук 50-гар диэри саастаахтарга Иван Татариновка, 50-тан 60-гар диэри саастаахтарга Степан Кычкиҥҥа уонна 60-тан үөһээ саастаахтарга Николай Стручковка биир дойдулаахпыт Руслан Федотов маҕаһыыннарыттан табаар ыларга сертификаттары туттардыбыт. Онтон бэйэбит хамаандабыт туһунан этэр буоллахха, эдэрдэргэ Алексей Пахомов 47шаары, Сандал Кожуров 23 шаары, 50-тан 60-гар диэри саастаахтарга Игнатий Гаврильев 19 шаары уонна 60-тан үөһээ саастаахтарга Роман Шилов 9 шаары, 65-тэн үөһээ саастаахтарга Михаил Неустроев 13 шаары хамаандаларыгар аҕалан үчүгэйдик оонньоотулар, аммаларын аатын түһэн биэрбэтилэр», — диэн Григорий Григорьевич сырдатта.

Кыайыылаах хамаанда грамоталарынан, мэтээллэринэн наҕараадаланнылар. Ону сэргэ усунуостара төннөрүлүннэ.

«Амма олоҕо» хаһыат

Читайте дальше