Саха Өрөспүүбүлүкэтин Ил Дархана Айсен Николаев Ил Түмэҥҥэ анаан Анал этиитин биир долгутуулаах түгэнинэн биһиги биир дойдулаахпыт, биллэр кыраайы үөрэтээччи Алтан нэһилиэгэр өр сыл дириэктэринэн, баһылыгынан үлэлээбит Вячеслав Окороковы бар дьон ортотугар Уһуйааччы уонна аҕа сүбэһит сылынан ойоччу тутан бэлиэтээбитэ буолла.
Вячеслав Данилович Саха сиригэр биллэр Окороковтар аҕа ууһун педагогическай династияларын биир чаҕылхай бэрэстэбиитэлэ буолар. Учуутал, уһуйааччы Окороковтар династияларын педстажтара 2000-тан тахсар! Бу туһунан Вячеслав Данилович чугас доҕоро СӨ үөрэҕириитин, РФ уонна СӨ физкультураҕа уонна спорка туйгуна, РФ уопсай үөрэхтээһинин бочуоттаах үлэһитэ, Амма улууһун, Амма нэһилиэгин бочуоттаах олохтооҕо, “Профсоюзнай хамсааһын сайдыытыгар кылаатын иһин” анал бэлиэлээх спорт бэтэрээнэ Николай Гурьев үөрэн санаатын үллэһиннэ:
—Доҕорум Вячеслав Данилович өр сыл устата Окороковтар династияларын төрүччүтүн үөрэтэн, оҥорон, кэргэнэ Ирина Дмитриевналыын “Сырдыгынан сыдьаайар удьуор утума” уонна быйыл “Баачыма эбэттэн төрүттээх Уокаракап аймахтар” диэн улахан кинигэлэри оҥорон таһаартардылар. Маны таһынан төрөөбүт түөлбэтэ Алтан нэһилиэгин туһунан эмиэ элбэх киһи сэргии ааҕар кинигэлэрдээх, үгүс суруйуулардаах. Онон бүгүн өрөспүүбүлүкэбит Ил Дархана Айсен Сергеевич бэйэтин этиитигэр Окороковтар династияларын бэлиэтээбитин, Вячеслав Даниловиһы Сахабыт сирин бас-көс дьонун ортотугар чиэстээбитин киэн тутта, үөрэ көрдүм, — диэн Николай Герасимович иһитиннэрдэ.
Вера ИВАНОВА.