Алтынньы 26 күнүгэр Чурапчыга харахтарынан мөлтөхтүк көрөр дьоҥҥо голбол уонна дартс күрэҕэ буолан ааста. Күрэхтэһии Аан дойдутааҕы харахтарынан мөлтөхтүк көрөр дьоҥҥо анаммыт “Үрүҥ торуоска” декадатын чэрчитинэн ыытылынна. Чурапчы сиригэр-уотугар ыаллыы сытар Таатта, Мэҥэ Хаҥалас, Амма улуустарын хамаандалара бастыҥнары быһаарыстылар.
Бу күрэхтэһии “Илин эҥэр кубогын иһин” диэн ааттанан аан бастакытын тэриллэр. Манна биһиги улуустан 6 киһи кытынна. Ол курдук үстүү киһилээх эр дьон уонна дьахталлар хамаандалара баран ситиһии көтөллөөх кэллибит. Дьахталларга олус эрэллээхтик Амма хамаандата кыайыылаах таҕыста уонна көһө сылдьар Кубок хаһаайыннарынан буоллулар. Эр дьоммут бочуоттаах үһүс миэстэни эрийсиилээхтик, бэрт кыранан хаалан ыллылар.
Маны сэргэ дьахталларга Александра Устинова “Бастыҥ оонньооччу” номинация хаһаайына буолла.
Голбол күрэҕин сэргэ дартска күрэх ыытылынна. Манна да биһиги улуус хамаандата ситиһиилээхтик кытынна. Ол курдук эр дьоҥҥо Николай Кириллин бастакы, Владислав Константинов үһүс миэстэни буолары ситистилэр. Онтон дьахталларга Мария Уваровская үһүс бочуоттаах миэстэни ылла. Ити курдук Амма улууһун хамаандата 4 кыһыл көмүс, 5 боруонса мэтээллээх уонна көһө сылдьар “Илин эҥэр Кубогын” дойдубутугар илдьэ кэллибит. Онон кэлэр сылга илин эҥэр Кубога Амма улууһугар ыытыллар буолла.
Бу улахан күрэххэ кыттарбытыгар хамаандабытын тэрийэн ыыппыт улууспут спортка управлениетыгар (начальник Дмитрий Наумов) уонна сылаас олбохтоох массыынабыт суоппарыгар Ньургун Афанасьевка лириҥ махталбытын тириэрдэбит. Хамаандабытын улуустааҕы инбэлииттэр уопсастыбаларын адаптивнай көрүҥнэргэ исписэлииһэ Семен Кильбясов иилээн-саҕалаан, салайан илдьэ сырытта.
Александра УСТИНОВА, Амматааҕы көрбөттөр уопсастыбаларын бэрэссэдээтэлэ