Е.А. Шишигин аатынан Сатаҕай орто оскуолатын дириэктэрэ Иванна Шишигина Дойду аҕа баһылыга бэйэтин Туһаайыытыгар оҥорбут этиилэрин астыммытын уонна бу Туһаайыы кэнниттэн маннык күүстээх салайааччылаахпытыттан киэн туттубутун этэр.
“Арассыыйа Бэрэсидьиэнэ Владимир Путин быйылгы Туһаайыытыгар элбэх саҥа тосхоллору бэлиэтээтэ. Кини инники 2030 сылга диэри хайдах сайдыахтаахпытын саас сааһынан эппитин бары да сэргии уонна астына истибит буолуохтааххыт. Ол курдук билигин баар национальнай бырайыактар бары ситиһиилээхтик үлэлии тураллар диэн бэлиэтиибин. Бу бырайыактар хас биирдии эйгэнэн дьон олоҕо тупсуутугар туһуламмыттара. Онтон бу Туһаайыыга Владимир Владимирович Путин эбии биэс саҥа национальнай бырайыактар киирэллэрин туһунан эттэ. Онно холобура “Семья” диэн национальнай бырайыак киирэн оҕолоох дьиэ кэргэни өйөөһүҥҥэ, оҕо төрөөһүнүн улаатыннарыыга туһаайыллыаҕа. Аны туран “Кадр” диэн национальнай бырайыак киирэр буолбутун истэн сэргээтим уонна үөрдүм. Бу бырайыак үлэлээтэҕинэ билигин бары эйгэҕэ сытыытык турар боппуруос быһаарыллыа дии олох эрэнэбин. Аны аҕам саастаах дьоммут доруобуйалара тупсуутугар, бөҕөргүүрүгэр “Продолжительная и активная жизнь” диэн национальнай бырайыак үлэлиэҕэ. Биир үөрэ истибитим диэн 2030 сылга диэри дьиэ кэргэн ипотеката уһуур буолла. Бу олус үчүгэй. Чэпчэтиилээх ипотека көмөтүнэн элбэх ыал дьиэлэннэ. Онон бу саҥа киирэр уонна үлэлии турар бырайыактар, бырагыраамалар, оҥоһуллар көмөлөр барыта Арассыыйа гражданнарын, ол аата биһиги олохпут туруктаах буоларыгар, сарсыҥҥы күҥҥэ эрэллээх буоларбытыгар туһуланаллар”, — диэн Иванна Ивановна санаатын үллэстэн ыытта.
“Амма олоҕо” хаһыат