Аһаҕас турнирга уопсайа 13 хамаанда кытынна. Ол иһигэр 6 дьахтар, 7 эр дьон хамаандалара Дьокуускай куораттан, Соморсун, Сулҕаччы, Чакыр, Бөтүҥ, Болугур, Абаҕа нэһилиэктэриттэн кыттан илин-кэлин түһүстүлэр. Күрэххэ хамаандаларга икки оскуола оҕото киирэрэ көҥүллэнэр буолан, үксүн ДЮСШ филиалларыгар дьарыктанар оҕолор кэлэн улахан күрэххэ кыттыбыттара кэрэхсэбиллээх.
Бу күрэҕи Пантелеймон Иванович оҕолоро, бары аймахтара иилээн-саҕалаан, тэрийэн үрдүк таһымнаахтык ыыттылар. Абаҕаттан төрүттээх Кармановтар бары ыччаттара түмсэн, сүүрэн-көтөн, аҕа уустарынан көмөлөөн үбүлээн уонна “Харысхал” ХЭТ, “ГанГа” ХЭТ спонсордаан ыытылынна. Бары кыттыбыт спортсменнар, нэһилиэк олохтоохторо бу күрэхтэһииттэн астынан, дуоһуйан, махтал тылларын этэн тарҕастылар.
Түмүккэ, дьахталларга 1-кы миэстэ Абаҕа бастакы хамаандата, 2 миэстэ Абаҕа иккис хамаандата, 3 миэстэ Чакыр хамаандата, онтон эр дьоҥҥо 1-кы миэстэ Абаҕа бастакы хамаандата, 2-с миэстэ Сулҕаччы хамаандата, 3-с миэстэ Соморсун хамаандата таҕыстылар. Уопсай түмүккэ Абаҕа хамаандата бастакы миэстэҕэ тахсан кубок хаһаайынынан буолла. Ону таһынан номинация хаһаайыннарыгар сыаналаах бириистэр, сертификаттар туттарылыннылар.
“Наһаа үчүгэй күрэхтэһии буолла. Уолаттар да, кыргыттар да хамаандалара олох киһи астынар гына оонньоотулар. Уолаттар бары да олус бэркэ табыллан, бэйэ бэйэни өйдөһөн, киһи астынар оонньуутун бэлэхтээтилэр. Маладьыастар, өссө да элбэх үчүгэй оонньууну көрдөрүөхтэрэ диэн эрэнэбит. Хамаандаҕа биир да оонньооччу киһи кэннигэр саһа сылдьыбата, бары наһаа кыраһыабайдык оонньоотулар. Өссө тупсун, сайдын, ситиһиилэнин”
“Наһаа үчүгэй тэрээһиннээх күрэхтэһии буолла. Убайдыы-быраатттыы Кармановтар оҕолоругар төрөппүттэрин үрдүктүк сыаналаан, үрдүк таһымнаахтык ыыппыттарыгар киһи олус үөрэр, бэйэбит оҕолорбут үчүгэй оонньуну көрдөрөн үөрүүбут муҥура суох, маладьыастар!”
“Волейболга Пантелеймон Иванович Карманов кэриэһигэр ыытыллыбыт, Бырааттыы Кармановтар күрэхтэһиилэрин тэрийбит дьоммутугар-сэргэбитигэр, күрэхтэһиигэ кыттыбыт хамаанда спортсменнарыгар, Абаҕа нэһилиэгин дьаһалтатын аатыттан барҕа махталбытын биллэрэбит. Бырааттыы Кармановтар бириистэригэр икки сылга биирдэ ыытыллар волейбол күрэҕэ, Абаҕабыт эдэр ыччатын чөл олоххо иитэр уонна спортка уһуйар биир бастыҥ көрүҥмүт буолар. Быйылгы күрэхтэһиини үрдүк таһымҥа тэрийэн ыыппыт Кармановтар дьиэ кэргэттэригэр уонна Пантелеймон Иванович бииргэ үөрэммит доҕотторугар, туох баар үтүөнү-кэрэни, сырдыгы-ырааһы баҕарабыт!”, — диэн баҕа санаалар этиллиннилэр.
Юлия ЯКОВЛЕВА