Соморсун нэһилиэгэр төрдүс сылын «Победа» үлэ лааҕыра үлэлиир. Лааҕыр үлэтин тэрийиигэ олохтоох дьаһалта Амма улууһун үлэлээх буолуу киинин кытта оҕону сайыҥҥы үлэнэн хабыы бырагырааматынан икки өрүттээх сөбүлэҥ түһэрсэннэр үлэ ыытыллар. Соморсун нэһилиэгин дьаһалта маныаха “Нэһилиэги тупсарыы үлэтигэр” бырагырааматынан эбии үп көрөр. Сайын устата уопсайа 15-20 оҕо үлэнэн хабыллар.
Лааҕыр үлэтин педагогическай үлэ бэтэрээнэ Клара Дмитриевна Гермогенова Соморсунтан төрүттээх Кайыыны уһансыбыт буойуттар, тыылга үлэлээбит бэтэрээннэр сырдык ааттарыгар мас олордуутугар дьону-сэргэни көҕүлээн саҕаламмыта. Манна бэтэрээннэр оҕолоро, сиэттэрэ, аймахтара кыттыһан араас талахтары, садовай култуура үүнээйилэрин атыылаһан олордубуттара. Онно эбии олохтоох дьаһалта хатыҥ, бэс мастары, сайыҥҥы өттүгэр сибэккилэри олорторбута. Билигин Кыайыы саадыгар барыта 25 араас көрүҥ үүнээйи үүнэр.
2022 сылга лааҕыр оҕолоро “Арассыыйа ийэлэрэ” Амматааҕы салаата көҕүлээбит нэһилиэктэр сайдыыларыгар туһуламмыт бырайыактары көрүү күрэҕэр “Кыайыы саада” бырайыагынан кыттан бириистээх миэстэҕэ тиксибиттэрэ. Саады салгыы тупсарыыга үбүлээһин ылбыттара.
Оҕолор Албан аат болуоссатынан, Ийэ уонна оҕо искибиэринэн уопсайа 200-тэн тахса маска, талахха, 300-тэн тахса сибэккигэ уу кутан, кыһаллан бүөбэйдээн көрөллөр-истэллэр. Сайынын болуоссат, искибиэр отун ыраастаан сыралаах үлэни көрсөллөр. Маны таһынан нэһилиэк киин уулуссатын, Амма эбэ биэрэгин ыраастыыллар. Итиэннэ нэһилиэккэ кырааска субуотунньуктарыгар төһүү күүс буолаллар. Оҕолору төрдүс сылын уопуттаах оҕуруотчут, орто оскуола повара Евдокия Васильевна Иванова салайан үлэлэтэр.
Нэһилиэкпит баһылыга Алексей Юрьевич Кононов лааҕыр үлэтин өйөөн, оҕолору сыллата Амма улууһун, Сахабыт сирин кэрэ, бэлиэ сирдэринэн күүлэйдээн кэлэллэрин тэрийэр. Харама хайатыгар, Булуус, Күрүлүүр курдук ытык сирдэри көрөн, оҕолор үөрүүлэрэ үгүс.
Эһиил Кыайыы 80 сылыгар, онтон кэлэр сылларга болуоссаппытыгар – Кыайыы саадыгар хас биирдии бэтэрээн сырдык аата үүнээйигэ тиллэн, кинилэр хорсун олохторун салҕаан чэлгийэ үүнүөхтэрэ диэн баҕа санаалаах кэнчээри ыччаппыт үлэлиир-хамсыыр, ону нэһилиэкпит олохтоохторо өйдүөхтэрэ, өйүөхтэрэ диэн эрэнэбит.
Надежда БЕЛОЛЮБСКАЯ, Соморсун нэһилиэгин баһылыгын социальнай боппуруостарга солбуйааччы