Сэтинньи ый 6 күнэ, 2023 сыл. Бу күн В.М.Новиков — Күннүк Уурастыырап аатынан Эмис орто оскуолатыгар ураты бэлиэ буолла. Оскуола төрүттэммитэ лоп курдук 100 сыла туолла.
100 төгүл маңнайгы чуораан, 100 сыл бүтэһик чуораан чугдаардаҕа. Сарсыардаттан оскуолабыт үөрэнээччилэрин, үлэһиттэрин, ыалдьыттарын сырдаан, бырааһынньыктыы киэркэйэн көрүстэ.
Күн бастакы аңарыгар алын сүһүөх үөрэнээччилэригэр анаан орто сүһүөх оҕолоро Захарова Айталыына, Соловьева Нарыйаана, Петрова Сайаана, Степанова Сандаара уонна учууталлар Неустроева Татьяна Герасимовна, Солдатова Саргылаана Револьевна оскуола иһинэн үлэлиир Күннүк Уурастыырап уонна история кылаас-музейдарыгар сырытыннаран кэпсээтилэр. Эбии үөрэхтээһин педагога Владимирова Матрена Иннокентьевна Бэлиэ күн түгэннэрин хаартыскаҕа түһэрэн, видеоҕа устан үйэтиттэ.
Онтон күн иккис аңарыгар тапталлаах оскуолабыт төрөөбүт күнүн бэлиэтиир үөрүүлээх линейкаҕа муһуннубут.
Саха республикатын Национальнай архыыбыттан көстүбүт докумуоңңа суруллубутунан, 1923 сыллаахха, ол эбэтэр оруобуна 100 сыл анараа өттүгэр, сэтинньи ый 6 күнүгэр Эмискэ 1 кылаас арыллыбыт.
Үөрүүлээх чааһы 2 кылаас бастың үөрэнээччитэ Неустроева Наташа, 4 кылаас туйгун үөрэнээччитэ Устинова Ньургуйаана, 11 кылаас бастың үөрэнээччитэ Бубякин Богдан иилээн-саҕалаан ыыттылар. Оскуола дириэктэрэ Захаров Гаврил Дмитриевич ыалдьыттары, үөрэнээччилэри, үлэһиттэри бэлиэ күнүнэн эҕэрдэлээтэ. Оскуола педагог-библиотекара Захарова Ульяна Устиновна оскуола тэриллиитин, структурата уларыйыытын чуолкайдык кэпсээтэ.
Күөрэлэ алааска турбут оскуолаҕа үөрэммит үөрэнээччилэр, сэрии сылын оҕолоро, үлэ-тыыл ветераннара Солдатова Екатерина Николаевна, Пестерева Евдокия Егоровна, Наумов Иван Иванович, 1975 сыллаахха саңа тутуллубут оскуолаҕа үлэлээн ааспыт ветеран учууталлар Гаврильев Алексей Ильич, Неустроева Прасковья Семеновна, Михайлов Анатолий Алексеевич, Петров Иосиф Васильевич уонна меценат Константинова Наталья Николаевна кэлэн ыалдьыттаатылар. Кырдьаҕас үөрэнээччилэр урукку ыарахан кырыымчык кэмҥэ хайдах үөрэммиттэрин, ыраах алаастартан атын алааска 3-10 км сатыы хааман, тоңон-хатан кэлэллэрин, ол да буоллар хайдах курдук билиигэ-көрүүгэ тардыһалларын туһунан элбэҕи оҕолорго кэпсээтилэр. Ветеран учууталлар сэбиэскэй кэмңэ сайыңңы лааҕырдары тэрийэн, оҕолору үлэҕэ, сатабылга уһуйалларын, үөрэтэллэрин, көрдөрөр, үөрэтэр тэриллэрин бэйэлэрэ илиилэринэн оңороллорун бэрт интэриэһинэйдик кэпсээтилэр. Меценат Константинова Наталья Николаевна саңа бырайыактары киллэриигэ санаатын эттэ. Түмүккэ бары биири баҕаран туран элбэх кинигэни ааҕалларыгар, сахалыы ыраастык саңаралларыгар, тыа сирин олоҕор сыстаҕас, сатабыллаах, олоххо бэлэмнээх үтүө дьон буолан тахсалларыгар алгыстарын эттилэр. Оскуола иһинэн үлэлиир оҕо тэрилтэтин президенэ Ларионова Милена эҕэрдэлээтэ, оскуола билиңңи олоҕуттан сырдатта.
Оскуолаларын төрөөбүт күнүгэр күндү бэлэҕинэн буолла үөрэнээччилэр бу күңңэ ылбыт “5”сыаналара.
Ону тэңэ үбүлүөйдээх сылга «Бастың үөрэнээччи» анал ааттары алын сүһүөх кылаастарга 4 кылаас туйгун үөрэнээччитэ Ларионова Виолеттаҕа, 4 кылаас бастың үөрэнээччитэ Захаров Алешаҕа, үрдүкү кылаастарга 10 кылаас үөрэнээччитэ Гаврильева Каринаҕа, 11 кылаас үөрэнээччитэ Бубякин Богдаңңа иҥэрдилэр.
Тапталлаах оскуолабыт,
Эйиэхэ “быраһаай” диэбэппит,
Эйиэхэ эргиллэ туруохпут.
Эн эрэн, ханна да буолларбыт
Эн сырдык сулускун булуохпут.
Алын сүһүөх учуутала Татьяна Неустроева,
эбии үөрэхтээһин учуутала, «Эрэкэ-дьэрэкэ» ансаамбыл салайааччыта Матрена Владимирова.