Саҥа дьыл бырааһынньыктарын өрөбүллэригэр өрөспүүбүлүкэ араас улуустарыттан түмүллэн оҕолор Аллараа Бэстээх — Владивосток – Кытай хайысханан күүлэйдээн кэллилэр.
Кыһыҥҥы уһун сынньалаҥ күннэригэр өрөспүүбүлүкэ араас улуустарыттан барыта 40 үөрэнээччи, 6 салайааччы буолан Владивостогунан Кытайга кэрэхсэбиллээх айаҥҥа сылдьан кэллилэр. Бу бөлөххө В.М. Новиков — Күннүк Уурастыырап аатынан Эмис орто оскуолатын үөрэнээччилэрэ Карина Гаврильева, Ангелина Андреева, Анжелина Ноговицына, Алгыс Пестерев, Игнатий Устинов киирэн эмиэ элбэҕи билэн-көрөн кэллилэр. Саҥа эмиэ Дьыл бырааһынньыктара буолан, тиийбит сирдэрэ барыта киэркэйбит харыйа күлүмүрдэс уотунан оонньоон, куораттар араас уотунан чаҕылыйан тураллара олох остуоруйа дойдутугар сылдьар курдук этибит диэн кинилэр кэпсээннэрин саҕалаатылар.
“Кытайга Владивостоктан автобуһунан айаннаан Приморскай кыраайы кытары кыраныыссалаһа сытар Хуньчунь куоракка тиийбиппит. Хуньчунь диэн нууччалыы “приграничье” диэн тылбаастанар. Куоракка туризм сайдыбыт эбит. Арассыыйаттан үгүс дьон кэлэн күүлэйдээн, Кытай медицинатын туһана, ордук тиис оҥотторо, эмтэнэ, атыыһыттар чэпчэки табаар атыылаһа кэлэллэр эбит. Нууччалыы олус бэркэ билэллэрэ сөхтөрдө, ол иһин түргэнник өйдөспүппүт. Иккис сылдьыбыт куораппыт Яньцзи. Бу Хуньчунь диэн куораттан быдан улахан мегаполис диэххэ сөп, улахан этээстээх дьиэлэр бааллара сөхтөрдө. Манна сир анныттан тахса турар эмтээх, итии сүүрээн баарыгар үгүс турист анаан көрө кэлэр эбит. Маны сэргэ аан дойду үрдүнэн саамай уһун уонна саамай үрдүк тутуута — өстүөкүлэ күргэ баар. Курдары көстө турар муоста устун хаамар ураты туспа абылаҥ этэ.
Кытайга бастыкыбытын сылдьыбыт буолан элбэх уратыны көрдүбүт, дьоно-сэргэтэ олус үөрүнньэҥин, эйэҕэстэрин бэлиэтээтибит. Култууратын, аһылыктарын сөбүлээтибит, өссө да Кытайга кэлэ сылдьыа этибит. Биһигини салайан илдьэ сылдьыбыт, бу айаны тэрийбит салайааччыларбытыгар улахан махталбытын тиэрдэбит. Бииргэ айаҥҥа сылдьыбыт саҥа доҕоттобутун кытары куйаар ситимин нөҥүө сибээспитин тута сылдьабыт. Ол эрэн дойдубутун, төрөппүттэрбитин, бииргэ үөрэнэр оҕолорбутун, оскуолабытын ахтан аҕай кэллибит, — диэн айаннарын туһунан сырдаттылар.
Ити курдук оҕолор бэйэлэригэр саҥа сири арыйан, элбэҕи билэн, дуоһуйа сынньанан кэлэн, бу чахчы да, Саҥа Дьылга ураты умнуллубат бэлэх буолбут бырайыак өссө да ыытылла турарыгар баҕарабыт.
Алена ГАВРИЛЬЕВА, Эмис орто оскуолатын 8-с кылааһын үөрэнээччитэ.