Болугур нэһилиэгэр М.А. Ноговицын аатынан култуура киинэ уонна Е.Е. Пахомов аатынан Болугур орто оскуолата, үөрэнээччилэргэ анаан Аан дойдутааҕы Кыыс күнүнэн бииргэ тэрээһин ыыттылар. Тэрээһиҥҥэ оскуола саастаах кыргыттар араас сүбэ маастар- кылаастарга сылдьан элбэҕи биллилэр, бэйэлэригэр иҥэриннилэр.
Кыргыттарга маастар-кылааһы нэһилиэкпит бэйэ өттүнэн дьарык оҥостон ситиһиилээхтик үлэлии сылдьар кыргыттарбыт Туяра Охлопкова сирэйи хайдах оҥосторго, онтон Ирина Олесова баттаҕы хайдах көрүнэргэ сүбэ-ама биэрдилэр, ону тэҥэ кыргыттары модель гынан оҥорон көрдөрдүлэр.
Маны таһынан оскуола үөрэнээччилэрэ Валерия Максимова, Аида Мухина SHIN RAMEN-у лапса аһыытын арыый ньулутар гына эбии сыр, үүт кутан буһаран көрдөрдүлэр.
Маастар кылаастар кэннилэриттэн уолаттар сюрприз оҥорон кыргыттарын эҕэрдэлээтилэр, подарок туттардылар. Тэрээһин үрдүк таһымҥа ааһан үөрэнээччилэр үөрэн — көтөн тарҕастылар. Туяра Охлопковаҕа, Ирина Олесоваҕа сүрдээх улахан махталбытын тиэрдэбит. Кэрэчээн кыргыттарбыт куруук кэрэ, нарын, үтүөнү үксэтэ улаатын.
Евдокия ПЛАТОНОВА