Марианна Ефимова: «Баһырҕастаах аттаах Баабый Баатыр» испэктээккэ күүтэбит»

Олоҥхо ыһыаҕар аммалар биир тумус туттар ыччаппыт, филологическай наука кандидата, олоҥхону киэҥ араҥаҕа тарҕатааччы Юрий Борисов «Баһырҕастаах аттаах Баабый Баатыр» олоҥхотугар олоҕуран, «Сир симэҕэ» Арассыыйа көрдөрүүлээх, Саха Өрөспүүбүлүкэтин норуодунай ансаамбылын салайааччыта Марианна Ефимова үҥкүү тылынан дьүһүйүүтэ туруоҕа. Быйыл кыһын Амма күннэригэр бу испэктээк дьон-сэргэ киэҥ сэҥээриитин ылбыта.

 

Испэктээккэ кыттыбыт оҕолор былырыын «Океан» лааҕырга ситиһиилээхтик кыттаннар, сынньанан кэлбиттэрэ. Быйыл «Родной язык – достояние народов» өрөспүүбүлүкэтээҕи күрэххэ бырайыакпыт Саха Өрөспүүбүлүкэтин Гранын ылбыта, норуоттар икки ардыларынааҕы күрэхтэргэ Гран-при кыайыылааҕа буолбута, — диэн Марианна Васильевна үөрүүтүн үллэстэр.

«Сир симэхтэрэ» Амма олохтоохторун, ыһыах ыалдьыттарын бэс ыйын 20 күнүгэр Ф. Потапов аатынан Норуот айымньытын дьиэтигэр киэһэ 19 чаастан «Баһырҕастаах аттаах Баабый Баатыр» музыкальнай-хореографическай испэктээккэ үөрэ-көтө кэтэһэллэр.

  • Олоҥхо омуннаах эйгэтин,
  • Үҥкүү аптаах абылаҥын
  • Уруйдаан көрсүөҕүҥ,
  • Айхаллаан атаарыаҕыҥ! – диэн ыҥыраллар.

Санатан эттэххэ, билиэттэр норуот айымньытын дьиэтин кассатыгар атыыланаллар, төлөбүрэ – 500 солкуобай.

Олоҥхо ыһыаҕыттан тугу кэтэһэҕиний диэн ыйытыыбар Марианна Васильевна:

Аан Алахчын Хотун айбыт Аар айылҕатын кытары Орто туруу бараан дойду дьоно-сэргэтэ биир сомоҕо буоланнар, харахха хатанан хаалар, кэрэттэн кэрэ көстүүгэ кубулуйалларыгар, айылҕаттан айдарыылаахтарбыт сүдү талааннарынан хас биирдиибит уйулҕатын сөхтөрө долгутарыгар, кистэлэҥ күлүүстэринэн уйулҕабытын арыйан Орто дойду олоҕор тапталы күүһүрдэллэригэр баҕарабын! — диир.

 

Вера ИВАНОВА

Читайте дальше