Меценат биир дойдулаахтарын хаһан да умнубат

Амма Наахара нэһилиэгэр «Үтүө санаа харыйата» аахсыйа сыллата олус тэрээһиннээхтик ыытыллар. Манна лохтоохтор үөрэ-көтө минньигэс бэлэхтэри биэрэн аахсыйаҕа кыттыһаллар. Кинилэри кытары тэҥҥэ ыраах олорор биир дойдулаахтарбыт элбэх оҕолоох ыалларга, ыалдьар оҕолоох дьиэ кэргэҥҥэ кэһиилэрин ыыталлар.

Өнньүөс нэһилиэгэ биир убаастыыр киһитинэн меценат, урбаанньыт Руслан Федотов буолар. Кини нэһилиэк үлэтигэр өрүү болҕомтотун уурар, ыытыллар тэрээһиннэргэ көхтөөхтүк кыттар. Руслан Еремеевич биһиги нэһилиэк куруутун өйөбүл буолар киһибит.

Олохтоох дьаһалтаҕа сүбэ-ама биэрэн Өнньүөс сайдарыгар, улаатарыгар бэйэтин улахан кылаатын киллэрэр. Аҕыйах хонуктааҕыта Саҥа дьыл үөрүүлээх, күүтүүлээх бырааһынньыгын күөдьүтэн биэс ыалга оонньуурдаах харыйаны кэһии гынан ыытта. Элбэх оҕолоох ыалга күлүмүрдүү дьиримниир гирляндалаата. Күүппэтэх өттүттэн соһуччу бэлэх тутан ыаллар үөрүүлэрэ үксээтэ. Маны сэргэ Саҥа дьыллааҕы  аахсыйа саҕаланыаҕыттан Руслан Еремеевич сыллата элбэх минньигэс бэлэхтэри оҥорон биир дойдулаахтарыттан махтал тылларын өрүү тутар. Саҥа сылы көрсө Егор Григорьев аатынан спортивнай саалабыт быйылгы  үлэтин сезонун аһарыгар улахан суумалаах бэлэҕи ис сүрэҕиттэн оҥорон барыбытын үөрдүбүтэ.

Олохтоох дьаһалта баһылыга Захар Александров үлэтин отчуотугар чөл олоҕу өрө тутар, ыччаты кэрэҕэ угуйар, сайын өҥөрүк куйааска, кыһын томороон тымныыга күннэтэ скандинавскай хаамыынан дьарыктанар Далбар хотуттарга убаастыыр меценаппыт Руслан Федотов ыыппыт бэлэҕин харыйаны уонна харыйа оонньуурдарын туттаран турар. Сыл ахсын харыйаны хаалыктаах хаамынан дьарыктанар спортсменнарбыт күөлү ыраастаан, хаары чөмөхтөөн, киһи-аймах сынньанар, хаартыскаҕа түһэр сирин оҥорооччулар. Ис дууһаттан бэриллэр бэлэх, ахтылҕаннаах төрөөбүт дойдуга таптал, сахалыы сылаас сыһыан, олохтоохторго кыһамньы барыта биир киһиэхэ сүктэриллэриттэн сөҕө, махтана саныыбыт. Маннык дьаһаллаах, киэҥи толкуйдуур, ырааҕы ырыта көрөр  киһибитигэр Руслан Еремеевичка ситим нөҥүө баҕа санаа бастыҥын аныыбыт. Олоҕун оҥкула бигэ буоллун, уота сырдык буоллун! Санаабыт санаан салаллан салгын куккун үөрдэн күлүмнэттин! Үлэҕэр — олоххор үрдүктэн үрдүк ситиһиилэр кэлэ турдуннар! Үүнэр Саҥа сыл  кэскиллээҕи үксэттиҥ! Өрүү саргылааҕы салайан, табыллыыга тайана сырыт! Кэлэн иһэр сылга дьол — соргу тосхойдун диэн нэһилиэк олохтоохторун аатыттан ис сүрэхтэн махтанан алгыс тылбын анаатаҕым буоллун!

Ирина Корякина – Олесова.

Читайте дальше