П.И.Караканов аатынан Мээндигитээҕи орто оскуола үөрэнээччилэрэ сайын аайы үлэ уонна сынньалаҥ «Сайдыыс» лааҕырыгар астына сынньаналлар. Быйыл даҕаны хайа да сыллар курдук үлэ күөстүү оргуйда. Икки сезоҥҥа барыта 50 оҕо сырытта.
Лааҕыр иитиллээччилэрэ оскуолаларын оҕуруотун, тиэргэнин, нэһилиэк болоссуоттарын сибэккилэрин көрдүлэр-иһиттилэр. Маны таһынан араас аахсыйалары, күрэстэри ыыттылар. Нэһилиэкпит аҕам саастаах, инбэлиит дьонугар көмөлөһөн «Ис сүрэхтэн» диэн үтүө дьыаланан ыалларга тиийэн оҕуруот сиригэр сыыс оту хомуйан кырдьаҕастары үөртүлэр, махтал, алгыс тылларын ыллылар. Нэһилиэктэрин уулуссаларын, болуоссаттарын, искибиэрдэрин, өрүс биэрэгин хомуйан «Ыраас нэһилиэк», «Ыраас кытыл» аахсыйаларга кытыннылар.
«Өйдөбүнньүк чүмэчитэ», «Арассыыйа күнэ», «Нуучча тылын күнэ» бэлиэ күннэри тэрээһиннээхтик ыыттылар. Оҕолор төрөөбүт нэһилиэктэрин устуоруйатын билэр сыалтан олохтоох нэһилиэк түмэлигэр сырыттылар, нэһилиэкпит кэрэ, ытык сирдэринэн бэлэсипиэтинэн экскурсияҕа сырыттылар.
Олохтоох ааптар, хоһоонньут, оҕо суруйааччыта Дария Егоровна Васильева — Амма Даайыс кэлэн оҕолорго туойунан үлэҕэ маастар кылаас ыытан кэлэр сылга буолуохтаах Олоҥхо ыһыаҕар туһаайан араас оҥоһуктары бэлэмнээннэр оҕолор үөрүүлэрин өссө үрдэттэ.
Ити курдук икки сезон устата оҕолор элбэххэ үөрэннилэр, үгүһү биллилэр, интэриэһинэйдик сынньаннылар, оҕуруоттарын сибиэһэй аһын сиэн, кэрэ айылҕаҕа сынньанан күүс- уох ыллылар, доруобуйаларын тупсардылар. Аны сайын бары үөрэ-көтө эмиэ лааҕырбытыгар кэлиэхпит диэн баҕа санааларын эттилэр.
Изабелла ДАВЫДОВА