Кырыс сиринэн билиниллэр Мээндиги нэһилиэгэр быйыл бэһис төгүлүн полиция майора Владимир Никитин бирииһигэр мас тардыһыытын күрэҕэ тыҥааһыннаах киирсиилэрдээх ааста. Күрэхтэһиигэ аан дойду чемпионнара кэлэн күндү ыалдьыт буолан, күрэхтэһээччилэр санааларын көтөхтүлэр, долгуттулар даҕаны. Уопсайа 16 хамаанда сүүстэн тахса спортсмены түмтэ. Мээндигилэр күрэхтэһии бары кыттыылаахтарын иһирэхтик көрүстүлэр.
Саха омук төрүт оонньуутун биир көрүҥүнэн мас тардыһыыта буолар. 1990 сылтан бэттэх мас тардыһыыта дьон болҕомтотун тардар гына олус сайынна, тубуста. Ыһыылаах-хаһыылаах, көрүөхтэн эриэккэс, киһи кэтэһэр спордун көрүҥэ буолла. Мээндиги нэһилиэгэр үс күн устата спорт бэтэрээнэ, полиция майора Владимир Александрович Никитин бирииһигэр биирдиилээн уонна хамаанданан бастыыр иһин аһаҕас өрөспүүбүлүкэ таһымнаах мас тардыһыытын күрэҕэ ыытылынна. Күрэхтэһиигэ барыта 16 хамаанда кыттыыны ылла. Күрэхтэһиини бэһис төгүлүн П.И.Караканов аатынан Мээндиги орто оскуолата, Мээндиги нэһилиэгин дьаһалтата уонна Владимир Александрович уола Владимир Владимирович тэрийэн, биир сүбэнэн ыыталлар. Сүрүн тренер Семен Попов. Курэхпит кылаабынай судьуйата СӨ 1-кы категориялаах судьуйата Юрий Ефремов, сүрүн сэкирэтээрэ СӨ мас тардыhыытын хас да төгүллээх чемпиона Андрей Винокуров. Күрэхтэһиигэ Мэҥэ-Хаҥалас улууһуттан Майа, Төҥүлү, Тумул, Чурапчы улууһун Чурапчы, Арыылаах, Хадаар, Дириҥ, Сылаҥ, Таатта улууһун Ытык-Күөл нэһилиэктэриттэн, Хатастааҕы оҕо спортивнай оскуолатыттан, Хаҥалас улууһуттан, ону сэргэ Амматааҕы Н.Захаров-Сахаачча аатынан оҕо спортивнай оскуолатыттан, Чапчылҕан, Покровка, Сэргэ-Бэс, Сулҕаччы, Мээндиги нэһилиэгин эдэр мадьынылара кэлэн күөн көрүстүлэр.
Тыҥааһыннаах киирсиилэр түмүктэринэн олохтоох Мээндиги нэһилиэгин хамаандата кыайыылааҕынан таҕыста. Иккис миэстэ Чурапчы хамаандата уонна үһүс миэстэ Дьокуускай 1№-дээх оҕо спортивнай оскуолатын хамаандата буолла.
Быйылгы күрээх умнуллубат бэлиэ түгэнинэн Аан дойдуга мас тардыһыыга тэҥнээхтэрин булбатах, Узбекистаҥҥа ыытыллыбыт мас тардыһыытыгар Аан дойду чемпионатын кыайыылаахтара Анатолий Баишев, Егор Баишев, Татьяна Баишева, Дмитрий Неустроев, Айтал Антонов кэлэн ыалдьыттаатыбыттара буолла.
Эмилия ДАВЫДОВА, П.И.Караканов аатынан Мээндиги орто оскуолатын медиа-киинин чилиэнэ