Бүгүн, ахсынньы 7 күнүгэр, Мээндигигэ «Хонору» үрэҕи туоруур муостабыт үөрүүлээх аһыллыыта буолла. Сааскы халаан уутун хоромньутуттан эмсэҕэлээбит муостаны чөлүгэр түһэрии тутуу министиэристибэтэ «Аварийнай-чөлүгэр түһэрии» программатынан уонна Амма улууһун дьаһалтатын, «Мээндиги нэһилиэгэ» МТ күүстэринэн ыытылынна.
Бэдэрээччит Павлов Егор Юрьевич, биригэдьиир Семенов Василий Максимович, Никифоров Айсен Степанович, Охлопков Семен Дмитриевич уонна Мээндиги тутааччылара Охлопков Михаил Прокопьевич, Кривошапкин Владимир Романович, Иванов Михаил Николаевич үлэни тымныыны аахсыбакка, бириэмэтигэр, хаачыстыбалаахтык тутан туттардылар.
Муоста арыллыытын үөрүүлээх чааһыгар Амма улууһун баһылыга Кузьмин Степан Николаевич, муниципальнай сакаасчыт сулууспатын начальнига Новиков Николай Александрович кыттыыны ыллылар. Муоста арыллыытын кыһыл лиэнтэтин быһан, сахалыы уот оттон алаадьынан, арыылаах саламаатынан айах тутан Попов Егор Николаевич алгыстаата. Кэлбит ыалдьыттары «Сырал» ийэлэр түмсүүлэрин далбар хотуттара Пухова Нелли Викторовна, Стручкова Светлана Николаевна, Шишлянникова Галина Николаевна, Филиппова Анастасия Иннокентьевна алаадьынан күндүлээтилэр. Олохтоох дьаһалта, «Алгыс» культура киинин коллективтарын күүстэринэн сандалы остуола тэриллиннэ.
Хонору муостата нэһилиэкпит тыын суолталаах эбийиэгэ буоларынан олохтоотор үөрүүбүт улахан. Сайынын оттуур ходуһабытыгар, туристическай базаларга барар, кыһынын от-мас, муус тиэйиитин суола буолар. Онон тутааччыларга махталбыт улахан.
Альбина ФИЛИППОВА.